VOV4.K’ho- Drim ngai 15/06, mờr 2 rơbô nă kơnòm bơsram kấp bàr tàm Dăk Lăk tus bal dơ̆ pơrlòng sac rơ wah mut bơsram ơdŭ 10, nam bơsram 2022-2023. Dơ̆ pơrlòng sac rơ wah mut bơsram ơdŭ 10 tàm Dăk Lăk geh 2 Mpồl duh broă pơrlòng, bơyai lơh sac rơ wah tàm 3 hìu bơsram, tàm hơ̆ geh: Hìu bơsram kấp pe chuyên Nguyễn Du, Hìu bơsram kấp pe Dân tộc nội trú N’Trang Lơng mờ Hìu bơsram kấp pe Dân tộc nội trú Đam San. 56 Hìu bơsram kấp pe mờ 1 Anih tờm bơto bơtê bơsram tàp Tàp pràn să jan (geh bơto bơtê hệ kấp pe) gam wơl bơyai lơh rơ wah kơnòm bơsram mờ broă lơh sac rơ wah.

Pơrlòng mut bơsram ơdŭ 10 Hìu bơsram Nguyễn Du

Nàng gàr niam bơta lơngap lơngai, ờdo ờdă mờ di mờ kơrnoat pơrlòng, Sở Giáo zụk mờ Đào tạo Dăk Lăk neh ai 255 nă kwang bàng, cau pơgru, cau lơh broă tàm ală mpồl lơh broă ndai tus lơh kơnòl broă sền pơrlòng. Bơdìh hơ̆, Mpồl duh broă pơrlòng kung pơgồp bal mờ ală anih lơh broă geh gơnoar tàm ală tiah, ai mpồl lơh broă sền gàr bơta lơngap lơngai sền gàr niam tiah pơrlòng.

Cau mblàng K’Hạnh