VOV4.K’ho - Ngai òr (17/05), Mpồl kwang bàng Quốk hội càr Dăk Lăk neh geh dơ̆ lơh broă mờ UɃÑZ càr mờ ală sở, gah lơh broă tàm càr nàng rơcang ală tơngu me tus bal tàm pơrjum dơ̆ 3, Quốk hội khoă 15.

                  Ală kwang bàng pơgồp bal jơnau đơs tus mờ mpồl kwang bàng Quốk hội càr Dăk Lăk

Uă jơnau đơs gơrềng tus mờ kơ cế broă lơh tàm broă tơnguh bơtàu lơh sa mpồl bơtiàn càr dê neh geh bơtơl tàm rơndăp broă jơnau yal mờ Quốk hội. Tàm dơ̆ lơh broă, ala măt kwang đơng lam ală sở, gah lơh broă tàm càr Dăk Lăk neh đơs tus mờ uă bơta kal ke mờ dan dà lơgar sền wơl, bơsong ai broă tơnguh bơtàu lơh sa mpồl bơtiàn càr in tàm tơngai tus, bè tơnguh bơtàu năng lượng lơh geh wơl wèt gùng dà tơnguh bơtàu tus nam 2045, Cíñ phủ, Ƀộ Kông thương pal sền wơl nàng tơnguh bơta pràn lơh nàng tơnguh bơtàu năng lượng lơh geh wơl tàm càr Dăk Lăk.

Ală kwang bàng kung dan geh uă tơngu me gơrềng bal tus mờ phan geh is, sền wơl kơ cế krơi is ai ƀòn dờng Buôn Ma Thuột, broă ai rơndăp ù tiah, broă ngui ù; broă geh ờ uă gơl gùng gam gơtìp ờ niam mơya ờ hềt geh ai priă nàng lơh niam wơl. Mpồl kwang bàng Quốk hội càr Dăk Lăk iăt ală jơnau pơgồp bal, jơnau dan bơh ală kwang bàng, tơrgùm, tam cah is nàng yal mờ Quốk hội mờ ală Ƀộ, gah lơh broă dà lơgar in bơsong.

Cau mblàng Ndong Brawl