Gam blơi ờ uă bơta phan ro nàng drơng Satềp tàm siêu thị Co.op Mart ƀòn dờng Buôn Ma Thuột, lŏ Võ Thị Mỹ Hương, kis tàm sơnah ƀòn Tân Lợi, ƀòn dờng Buôn Ma Thuột pà git, nam do tài lơh sa kal ke den tàng hìu nhă lŏ mìng blơi ală bơta phan geh kwơ. Lŏ Võ Thị Mỹ Hương pà git tai: “Hìu nhă kung blơi ală bơta phan geh kwơ mơ nàng ngui tàm Satềp, tài bơta gơrềng bơh kòp Kovid gam tơngŏ den tàng làng bol ờ hoan lòt blơi phan, mìng blơi ală bơta phan geh kwơ mơ”.

Lòt dùl dar tàm Drà dờng Buôn Ma Thuột di gơlan gơtùi gŏ, ală bơta phan drơng satềp neh geh ală au tăc phan ràng nàng tăc mờ uă bơta, sền niam măt, mơya khà cau tus blơi kung gam ờ gal ngan sơl. Lŏ Lê Thị Như, kis tàm tiah C, drà dờng Buôn Ma Thuột neh 15 nam tăc ală bơta phan ngui lơh broă pà git, cau tus blơi phan nam do ờ pràn ngan. Lŏ Lê Thị Như pà git: “Ờ geh cau tus blơi uă rơlao mờ nam lài, bè nam lài tăc geh bơh 5 tus 7 tơlăk đong, nam do den mìng geh bơh 2 tus 3 tơlăk đong mơ. Nam lài phan do geh bơh 20 rơlao hờ đang den geh tăc sùm, mơya nam do den ờ hoan geh cau tus blơi rơlao”.

Uă hìu tăc ƀan kèo, mứt, gar rơpung kài kung gơtìp tàm bơta ờ hoan geh cau tus blơi sơl. Jăt ồng Lương Ngọc Hoàng, cau tờm dùl hìu tăc ƀan kèo tàm Drà dờng Buôn Ma Thuột yal, nam do làng bol tus blơi phan lơyài ngan, mìng geh gal cau tus tàm ală ngai lồi poh, ồng mìng tơrgùm phan ndrờm mờ 60% pơn drờm mờ nam lài nàng tăc, mơya mờ broă blơi phan bè tŭ do di gơlan kung ờ khin nàng geh cau blơi jơh phan. Ồng Lương Ngọc Hoàng đơs: “Khà cau blơi phan kung ờ gal ngan sơl, priă tăc den kung ờ gơguh kas sơl. Mơya nam lài tàm tŭ do kung neh gal bloh, pơn drờm mờ nam lài den tŭ do kung ờ hềt geh bơta lơi”.

Kờp dŭ lài geh bơnah lơi gơmù bơta pràn blơi phan tàm drà kă bro tàm Satềp nam do, geh uă cau tăc phan tàm càr Dăk Lăk neh rơcang jòi sền nàng git jơnau kờñ, jơnau geh bơh cau ngui sa dê nàng ai geh ală gùng dà broă lơh uă ngan tàm broă prăp gàr, tam pà phan kă bro. Geh ờ uă cau tăc phan kung neh rề ơnàng ală gah tăc phan bơh tàm điện thoại, website, ală pang yal tơngit bè facebook, zalo nàng geh tus bal mờ cau blơi rơlao. Ală broă lơh tơmù priă tăc, bal mờ broă tam gơl pa broă lơh bè ràng tăc phan, yal phan kung geh ală cau tăc phan ngui nàng hòi jà nùs nhơm rơcang sền bơh cau blơi dê, hòi jà broă ngui sa. Lŏ Nguyễn Hằng Nga, cau tờm hìu tăc ào mpha yal: “Nam do đơs bal den lơyài rơlao, cau blơi den gơmù uă rơlao. Cau mờng blơi den kung gam tus mơya di lah bè lài do den cau blơi 10 tŭ do blơi bơh 5 tus 6, gam cau ờ mờng ờ gal rơlao. Cau tăc kung lơh ngan nàng geh tăc, ờ ờ uă bơta phan tơlik khà priă tăc mơya he kung ờ khin tơnguh tài cau blơi là cau mờng blơi sùm bơh lài, he tơnguh priă tăc den ờ gơtùi den tàng he mìng tăc sùm jăt mờ khà priă lài nàng gàr geh cau tus blơi, geh tŭ geh ală bơta ờ khin tơnguh priă tăc mờ bơta geh kwơ ờ uă nàng geh sùm cau năc tus blơi sơrlèt mờ tŭ kal ke”.

Ờ mìng drà kă bro phan ngui sa ờ geh gal cau tus blơi mờ drà kă bro bơkào mai kung bè hơ̆ sơl. Ồng Quang Thế Phong, dùl nă cau tờm suơn tam bơkào mai dờng ơnàng tàm xã Hoà Phú, ƀòn dờng Buôn Ma Thuột yal, nam do trồ tiah ram den tàng buôn ai ală cau tờm suơn in tam tờm bơkào mai klềs nha mờ lơh nàng lì bơkào di tàm satềp. Kàl bơkào Satềp nam do, ồng Phong tam 3 rơbô tờm mai mờ uă sơnam krơi is. Tŭ do ồng gam ai tờm mai tơmŭt tàm gri nàng cèng tăc. Kàl bơkào mai nam do tăc uă rơlao mờ nam lài di pơgăp 500 tờm, mơya ờ geh priă cồng uă. Ồng Quang Thế Phong đơs: “Priă tăc nam do ờ geh bè ală nam tài tờm mai ală tiah ndai cèng tus uă ngan. Bè dùl tơm nam lài tăc 4 tơlăk đong den Satềp nam do pal pơn drờm wơl gơmù gam 3 tơlăk 500 rơbô đong ha là geh tŭ mìng gam 3 tơlăk đong. Ală cau tam tờm mai bè bol añ pal lơh tơmù is priă tăc nàng geh tàm pơrlòng mờ tờm mai bơh tiah ndai cèng tus. Tŭ do suơn hìu añ neh dờp tăc geh ờ uă tờm cau tus blơi in, mờ khà tờm gam tai geh cèng tus tàm ƀlàng dờng Buôn Ma Thuột tăc tàm ngai 22 nhai 12 jăt tơngai he tus do”.

Làng bol tơmù broă ngui sa mờ broă tam gơl bè broă mờng blơi phan Satềp bơh ală hìu dê den tàng neh lơh drà kă bro Satềp tàm càr Dăk Lăk ngềt ngơ̆t ngan. Cau tăc mờ hìu tăc phan tơrgùm phan kă bro di mơ, bŭ lah bè hơ̆, ală cau ndrờm gam kơ̆p gơn tàm bơta gơguh uă bơh drà kă bro dê tàm ală ngai rềp mờ Satềp, do là tơngai ală cau lơh broă rê satềp mờ hìu nhă ƀòn lơgar mờ geh priă nhai pơn jờng tŭ lồi nam.