VOV4.K’ho- Bơh bồ nam tus tŭ do, bơta ờ tơl cau lơh broă geh broă lơh jak tàm ală kông ty, mpồl lơh sa kă bro tàm ù tiah càr Dăk Lăk uă ngan. Uă mpồl lơh broă mìng geh bàr pe rơhiang nă cau lơh broă lơm, tàm tă jơnau kờñ ngan ngồn nàng di pal broă lơh gơguh tus rơbô nă cau lơh broă. Bơta ờ tơl cau lơh broă uă ngan do neh gơ rềng tus broă lơh pờ ơnàng lơh sa, lơh sa kă bro bơh mpồl lơh broă dê.

Sùm uă nhai do, Anih lơh gơlik sơnò mat mờ tàñ may Hà Thư, Mpồl kông nghiệp Tân An, càr Dăk Lăk sùm ơm tàm bơta ờ tơl cau lơh broă uă ngan. Mò Nguyễn Thị Trang, cau tờm Anih lơh broă do dê pà gĭt, he kờñ săc rơ wah cau lơh broă pơgap 800 nă cau lơh broă geh broă lơh jak, mơya bulah bơh uă gah sac rơ wah kung mìng sac rơ wah geh pơgap 200 nă cau lơm. Ờ tơl cau lơh broă, anih lơh broă mìng pal lơh broă ing lơm, gơ rềng dờng ngan tus broă rơndap lơh bơtàu tơnguh wơl lơh sa. Mò Nguyễn Thị Trang đơs:

He kung yal sơl tàm ală pang jòi broă lơh mơya khà kông nhân tus tong sră dan lơh broă  ết ngan. Ală cau neh gĭt lơh broă  tàm tiah ne rê ơm rơlô kòp den ală cau do lòt tàm do dan broă  lơh den mìng lơh 2,3 nhai lơm den ală cau do rê wơl tàm Bình Dương, Đồng Nai nàng lơh, khi ờ lơh broă  jŏ jòng mờ kông ty he dê ờ. Kông nhân gam lơh broă  den tus kàl pĭc tiêu, kàl pĭc kơphê den khi ơm rơlô wơl nàng lòt lơh broă suơn sre mờ gơ lơh bè tơl nă cau ơm rlô den ờ geh cau lơi mut lơh broă  wơl.

Uă mpồl lơh sa kă bro tàm Dăk Lăk gam kờñ  ngan geh cau lơh broă gĭt lơh broă

Ndrờm bè mò Trang sơl, ồng Nguyễn Kim Tùng- Kwang atbồ Kông ty TNHH Sản xuất-Thương mại mờ Xây dựng Tùng Bách pà gĭt, Kông ty ồng dê kung ờ gơ tùi pờ ơnàng lơh sa, geh tŭ ờ hềt mut lơh broă jơh bơta pràn geh tŭ do bơh mpồl dê den tài bơh ờ tơl cau lơh broă geh broă lơh jak.

Bơh bồ nam tus tŭ do, kông ty añ kờñ sac rơwah pơgap 50 nă cau lơh broă mờ jòi pơgap rlau 10 ngai do, kung cih mờ ơn tàm uă gah ngan sơl mơya kung mìng sac rơwah geh 10 nă cau lơm. Bơta geh ngan tŭ do gam ờ tơl cau lơh broă là uă ngan. Gơ ờ tơl bè hơ̆ gơrềng uă ngan, pơn yơu bè mpồl lơh sa kă bro bơh añ dê kờñ pờ ơnàng bàr pe gah mờ lơh bè ờs gah lơh broă yau mơya ờ khin pờ tai tài bơh ờ tơl cau lơh broă.

 Jat Anih tờm Drơng broă mờ yal tơngĭt broă lơh tàm càr Dăk Lăk yal, kờp tus qúy 1, nam do, geh 674 mpồl lơh sa kă bro tàm càr mờ bơdìh càr cih sră sac rơ wah cau lơh broă, mờ jơnau kờ` sac rơ wah pơgap 30 rơbô nă cau lơh broă. Mơya, 3 nhai do, mpồl lơh broă do mìng pơlam broă lơh mờr 10 rơbô nă cau lơm mờ jơnau kờ` sac rơ wah cau lơh broă bơh uă mpồl lơh sa kă bro tàm ù tiah càr dê kung gam uă ngan. Ồng Nguyễn Văn Cường, Phó Kwang atbồ Anih tờm drơng broă mờ yal tơngĭt broă lơh càr Dăk Lăk pà gĭt, uă ngan jơnau gơ bàn là gơ rềng bơh kòp Kovid-19 gam kơn jơ̆ ngan.

Uă cau lơh broă tus tàm tơngai tŭ do neh gĭt tus mờ cau sac rơ wah cau lơh broă bơh mpồl lơh sa kă bro dê bơh ală gah yal tơngĭt bơh ală xã, sơnah bòn kung bè ală dơ̆ lơh broă  yal tơngĭt broă  lơh. Mơya, tài gơrềng bơh kòp bàr pe nă cau lơh broă khi gam rơ ngòt mờ kung ờ hềt khin lòt lơh broă tàm ală tiah kông nghiệp den tàng bè hơ̆ ờ tơl cau lơh broă là uă ngan

Tơrgùm kờp bơh Ủy ban Ñân zân càr Dăk Lăk dêl: tàm qúy 1 nam 2022, geh 227 mpồl lơh sa kă bro neh lơh broă wơl, gơguh 22,7% pơndrờm bal dùl tŭ  mờ nam 2021. Bơdìh hơ̆, geh 327 mpồl lơh sa kă bro crơng gơs pa, mờ 21,8% broă rơndap lơh, gơguh 19,78% pơndrờm bal dùl tŭ  mờ nam lài. Mơya, tài bơh kal ke tàm broă jòi cau lơh broă, ngan là ală cau lơh broă neh gĭt lơh broă neh lơh ală Kông ty, mpồl lơh sa kă bro gơ ơm tàm bơta kal ke. Jat ồng Nguyễn Hoàng Giang, Kwang atbồ Sở Lao động, Thương ƀiñ mờ Xã hội càr Dăk Lăk yal, Sở gam lơh ngan hời rơ hời tă bơsong kal ke tàm broă lơh dong kờl sac rơ wah cau lơh broă mờ bơto bơtê ai cau lơh broă in. Mơya cồng nha bơh sơnrờp kung gam ờ hềt lơh geh bè jơnau kơ̆p kờñ sơl.

Sở gam lơh ngan pơgồp bal mờ ală mpồl lơh sa kă bro ai jơnau yal tơngĭt, lơh geh khà gơ hòi gơ jà bè broă lơh cíñ sác nàng gơ hòi gơ jà cau lơh broă. Ai gơ wèt mờ ală cau geh jơnau kờñ nàng bơsram broă lơh, bơto bơtê broă den tŭ do ală Anih bơto bơtê broă lơh càr dê kung di pal mờ tơl jơnau kờñ kung bè Anih tờ,m bơto bơtê sùm tàm ală kơnhoàl ndrờm kung hòi jà cau bơsram nàng bơto bơtê ală gah broă  li la ngan. Mơya tơngai tŭ do mìng rơ̆p lơh geh 8,6% lơm. Mờr tus geh lơh ngan mờ kung lơh jơh nùs lơh ngan tai nàng lơh jat broă bơto bơtê broă lơh ai ală cau lơh broă tàm Dăk Lăk in.

Tàm tơngai ală mpồl lơh sa kă bro “kờñ ngan” geh cau lơh broă gĭt lơh broă mờ bơta ờ tơl cau lơh broă do geh gơrềng tơn tus bơta pràn bơtàu tơnguh wơl lơh sa kă bro den broă lam lơh ală broă lơh dong kờl bơ tàu tơnguh wơl drà kă bro cau lơh broă nàng tă bơsong kal ke di tŭ ai mpồl lơh sa kă bro in gam jal mhar ngan rlau mờ tŭ lơi jơh.

        Cau cih Nam Trang- Cau mblàng K’ Hạnh