VOV4.K’ho - Mho mờ mang ngai 07 nhai 09, hơ̆ là ngai 12 nhai 8 jăt tơngai àng kơnhai dê, ală mpồl dong kờl neh pơgồp bal bơyai lơh “Mang chờ ndar me”, jào pà phan trung thu ai kơnòm dềt in, pơgồp bal mờ kham kòp, pà sơnơm ờ sa priă ai làng bol rơƀah kis tàm ƀòn Ea Na, xã Ea Na, kơnhoàl Krông Ana, càr Dăk Lăk in.

         Mờr 750 nă kơnòm dềt kis tàm ƀòn Ea Na, xã Ea Na, kơnhoàl Krông Ana geh dờp phan trung thu

Jăt mờ hơ̆, bal mờ broă sền ală dơ̆ đơs crih tamya “Mang chờ àng kơnhai ndar me” bè: tamya nggài, đơs crih tamya, ală jơnau nhơl ờs mờng, sa ƀañ trung thu, 750 nă kơnòm dềt kis tàm ƀòn Ea Na gam geh dờp ală pò phan trung thu. Ală mpồl lơh broă kung jào pà 57 khà priă bơsram ai ală kơnòm bơsram jăk in. Kờp jơh ală pò phan pà bal mờ priă bơsram là 80 tơlăk đong, geh Kông ty CP Phơng sih Bình Điền mờ hìu sơnơm Thiện Hạnh dong kờl. Mờ ală y, ƀák sĩ tàm hìu sơnơm Thiện Hạnh kung bơyai lơh kham kòp, pà sơnơm ờ sa priă ai 500 nă làng bol kis tàm ƀòn Ea Na in mờ kờp jơh khà priă di pơgăp 50 tơlăk đong.

Cau mblàng Ndong Brawl