VOV4.K’ho - Tàm bàr ngai bơh ngai 13 tus 14 nhai 10, Đoàn ơruh pơnu Kộng sản Hồ Chí Minh càr Dăk Lăk bơyai lơh pơrjum cau ala măt dơ̆ 12, tơngai lơh broă bơh nam 2022 tus 2027 mờ broă tus bal bơh 300 nă cau ala măt, ala măt rơlao 90 rơbô nă đoàn viên, ơruh pơnu tàm gùt càr.

Mpồl đơng lam Đoàn ơruh pơnu Kộng sản Hồ Chí Minh càr Dăk Lăk khoă 12

Mờ jơnau cih “Lam lài-Niam chài-Tam klăc-Bơceh lơh-Tơnguh bơtàu”, tàm tơngai pa, cau kơnòm să càr Dăk Lăk tơrgùm lơh gơs ờ uă jơnau kờñ bè dong kờl geh bơh 5 ƀòn kal ke lơh gơs jăt jơnau kờñ ƀòn lơgar pa; tam mờ sền gàr 1 tơlăk 500 rơbô tờm chi; bơto bơtơl mờ tơnguh uă bơta pràn dà đơs lơgar bơdìh mờ tơrgùm bal mờ dunia ai kwang bàng đoàn mờ đoàn viên ơruh pơnu in. Nàng lơh geh ală jơnau kờñ do, lŏ H’ Giang Niê, Ƀí thư Đoàn ơruh pơnu Kộng sản Hồ Chí Minh càr Dăk Lăk khoă 12, tơngai lơh broă bơh nam 2022 tus 2027 pà git, mpồl đoàn geh sền gròi, bơto sồr tus mpồl đoàn viên ơruh pơnu tàm tiah ngài, tiah làng bol kòn cau, pơn jăt tai tơnguh uă bơta niam đoàn viên ơruh pơnu bơh ală tiah, nàng lơh broă đoàn mùl màl geh cồng nha mờ ngai sơlơ tơnguh bơtàu.

VOV Tây Nguyên – Cau mblàng Ndong Brawl