Tàm jơh ală tiah, cau lơh broă ndrờm tơnguh nùs nhơm tơriang, nùs nhơm bơsram bal mờ bơceh pa tàm lơh broă nàng lơh jăt nùs nhơm kơ̆p kờñ lơh pas ai să tờm mờ pơgồp bal tàm broă tơnguh bơtàu lơh sa mpồl bơtiàn càr dê.

Rê mờ ƀòn lơgar tàm ƀòn Sút Mđưng, xã Cư̆ Suê, kơnhoàl Cư̆ Mgar tơnơ̆ mờ kòp gơtờp dơ̆ 4 gơtìp tàm ală càr hờ đah jum dà lơgar, bi Y Uel Niê neh sùm jòi broă lơh nàng rài kis geh kơl jăp. Lài ngan bi lòt jì ñhơ̆t ơpah tàm suơn, lòt tui phan ơpah, lòt bơcă bràs mờ sơmăng lơh hìu... mờ 2 nhai do, bi neh jòi geh broă lơh kơl jăp là tăc phan tàm hìu tăc bơkào, tờm chi bơka, mờ priă nhai geh 300 rơbô đong tàm 1 ngai. Bi Y Uel Niê pà git, bŭ lah broă lơh lơi bi kung sùm lơh ngan ai jơh pràn nàng broă lơh geh cồng nha niam ngan, bơh tŭ hơ̆ geh tơnguh uă priă geh ai să tờm in: “Añ gŏ broă lơh do di pal ngan mờ añ, añ lơh ngan lơh broă nàng geh tai priă ai hìu nhă añ in”.

Sền gŏ geh bơta kwơ bơh broă ròng rơpu tàm mƀur chi brê, hìu nhă bi Y Bông Lào kis tàm kơnhoàl Ea Súp bal mờ 25 hìu ndai neh mŭt tai ròng tàm xã Cư̆ Mlan mờ mpồl rơpu ròng tus 500 nơm. Bi Y Bông Lào pà git, lài do hìu bi ròng rơpu jăt broă ròng bal mờ kơnrồ den tàng roh uă ngan tơngai mờ priă geh ờ uă, tơnơ̆ mờ tŭ jòi git jơnau yal bè broă ê rơpu tàm mƀur chi brê mờ geh gơnoar atbồ xã ai lơh jăt broă lơh do, hìu nhă bi neh dan cih măt tus bal. Tơnơ̆ mờ dùl tơngai ròng, bi Y Bông Lào gŏ geh cồng nha loh làng: “Hìu nhă kung ròng bơh 20 tus 30 nơm rơpu, den kung ai geh cồng nha tàm lơh sa uă, nam geh priă cồng bơh 20 tus 30 tơlăk đong, đơs ngan kung di, priă geh kung uă”.

Bŭ lah neh mờr 70 sơnam, mơya ồng Tạ Hữu Ổn, kis tàm Ƀuôn Ky, sơnah ƀòn Thành Nhất kung gam tơriang ngan lơh broă, jòi gùng dà broă lơh pa tàm broă tơnguh bơtàu lơh sa. Lài do rơlao 7 sào ù hìu nhă dê, ồng Ổn mìng tam kơphe bơrlŭ bal mờ tam tiêu, mơya tài khà priă gar tiêu sùm gơmù uă, mờ geh tai bơta là tiêu sùm gơtìp chơ̆t uă den tàng lơh gơtìp dồs. Ờ ngòt mờ kal ke, ồng Ổn neh jòi nàng git mờ bơsram tai tàm broă lơh sa, hơ̆ sồng tam gơl phan tam nàng tam plai bung kơmhò tơlir, pơgồp bal mờ ờ uă tờm chi sa plai ndai bè côm côm, quất... Tus tŭ do, broă lơh do sơlơ tơnguh bơtàu mờ rề ơnàng bă ù tam bal mờ priă geh rơlao 100 tơlăk đong tàm 1 nam. “Añ kung gam kơlôi là să tờm he lơh is là tờm ngan, añ gŏ rề ơnàng suơn tam añ dê, tam tai plai bung mờ tam tai ờ uă phan tam ndai, bañ mìng tam dùl bơta phan tam”.

Tơnơ̆ mờ 3 nam lơh kông ñân gơwèt mpồl Kơ điện tàm Kông ty Kổ phần Thép ESEAN, tàm tiah lơh sa mờ măi mŏk Hoà Phú, bi Y Huynh K’Buôr, kis tàm ƀòn Drai H’ Ning, xã Hoà Xuân, ƀòn dờng Buôn Ma Thuột tŭ do neh gơs cau chài lơh broă mờ priă geh rơlao 10 tơlăk đong tàm 1 nhai. Bi Y Huynh K’Buôr pà git, lài mờ tŭ mŭt lơh kông ñân tàm Kông ty, bi neh geh tŭ lòt lơh broă ơpah tàm broă lơh niam wơl rơndeh Honda. Kơnờm mờ broă mờng chài neh geh lơh, den tàng tŭ mŭt tàm Kông ty lơh broă, bi gơtùi mŭt mơ tàm broă lơh geh mhar rơlao. Broă lơh di pal, broă dong kờl priă niam neh dong kờl bi Y Huynh K’Buôr geh tai bơta pràn nàng lơh ngan: “Tàm broă lơh chờ hờp ngan, tơngai lơh broă tàm kông ty geh broă dong kờl bơh Kông ty uă ngan, priă nhai kơl jăp, tơl ngui tàm rài kis să tờm mờ hìu nhă. Añ kờñ lơh broă jŏ jòng tàm kông ty mờ lơh ngan jơh pràn ai kông ty in uă ngan nàng kông ty tơnguh bơtàu uă rơlao tai”.

Bŭ lah broă lơh krơi is, mơya ală cau lơh broă ndrờm geh bơta ndrờm bal hơ̆ là sùm tơriang, jơh nùs mờ bơceh pa tàm tŭ lơh broă. Gơwèt mờ ală cau lơh broă do dê, nùs nhơm gơboh gơbài ngan ờ di là ală bơta dờng màng, nùs nhơm gơboh là geh lơh broă mờ ală cau lơh broă gơboh kờñ mờ bơh ală broă lơh hơ̆ geh cồng ală cau lơh broă in geh priă kơl jăp tàm rài kis.