Tàm hơ̆ tơngume lơh ngan bơsram tai bơta gĭt wă, sền sơ wì bơta pràn jak kơnòm bơsram nàng tam pà broă bơsram sră tai gam geh sền gròi. Jat tŭ tơngai kờp dŭ lài bơh Ƀộ Giáo dục mờ Đào tạo dê, dơ̆ pơrlòng jơh bơsram kấp pe nam 2023 geh bơyai lơh tàm 2 ngai bơh ngai 28 tus ngai 29 nhai 06. Nam do, càr Dăk Lăk geh rlau 20 rơbô nă kơnòm pơrlòng cih mat dan pơrlòng tàm 32 tiah pơrlòng tàm 15 kơnhoàl, thị xã, ƀòn dờng tàm càr dê.

Ồng Phạm Đăng Khoa, Kwang atbồ Sở Giáo dục mờ Đào tạo càr Dăk Lăk pà gĭt: dơ̆ pơrlòng nam do, Bộ Giáo dục mờ Đào tạo pơn jat tai jàu ală tiah in kong kơnòl bơyai lơh dơ̆ pơrlòng. Den tàng, Sở Giáo dục mờ Đào tạo càr Dăk Lăk neh rcang lài lơh broă rơndap lơh bơh gờñ ngan. Tus tŭ do, broă lơh rcang ai dơ̆ pơrlòng jơh bơsram kấp pe nam 2023 gam geh lam lơh di tŭ tơngai.