VOV4.K’ho- Rê wơl mờ rài kis bè ờs pa, ală mpồl lơh sa kă bro tàm dơlam mờ bơdìh càr Dăk Lăk gam sơlơ rwah cau lơh broă nàng lơh wơl broă lơh sa, tŭ tơngai niam broă lơh geh pờ tơlik ai cau lơh broă tàm càr do in.

Ià tàm tê sră yal gơkờn lòt lơh broă tàm lơgar Nhờk, bi Nguyễn Anh Tú, ơm tàm thôn Hiệp Thắng, xã Quảng Hiệp, kơnhoàl Cư Mgar, càr Dăk Lăk pà gĭt, bi jơh bơsram gah măy mok rơndeh ô tô bơh Hìu bơsram Kao đẳng broă lơh càr Dăk Lăk dê bơh nhai 7 nam 2021, bi kung neh lơh broă tàm bàr pe tiah sơl mơya broă lơh ờ gŏ kơ̆ kơl jăp. Tơnơ̆ tŭ kơno yal pờ mpồng drà kă bro lòt lơh broă mờ lơgar ndai, bi pơyua sră tàm Anih tờm Yal tơngĭt broă lơh bơh càr Dăk Lăk dê. Tơnơ̆ 2 dar lùp, bi neh geh dùl kông ty Nhờk rwah. Tàm nhai 3 pa do, bi neh lòt tus ƀòn dờng Hồ Chí Minh nàng bơsram dà Nhờk mờ ală broă kờñ pal geh nàng lòt lơh broă. Bi Nguyễn Anh Tú yal: Oh kung lòt lơh bơdìh sơl, oh kờñ lòt tus lơgar Nhờk jòi dùl priă nhai kơ̆ kơl jăp tơnơ̆ bàr pe nam nàng ròng kis să tờm. Tàm tơngai tus, oh geh lơh ngan bơsram dà Nhờk nàng mhar lòt tus lơgar Nhờk.

Tơnơ̆ tŭ tơngai jòi ală jơnau yal rwah cau lơh broă, bi La Thị Thanh Lan ơm tàm thôn 2, xã Hoà Thuận, ƀòn dờng Buôn Ma Thuột kung mhar jòi geh broă lơh dipal tàm Kông ty Nhơl chờ càr Dăk Lăk. Bi pà gĭt: Gah bơsram bơh oh dê là lơh broă priă jền mpồl lơh sa kă bro den tàng oh sùm pờ tàm internet halà tàm ală app yal tơngĭt jơnau jòi broă lơh nàng sền broă dipal mờ broă bơsram bơh oh dê. Oh sền geh Kông ty Kổ phần Nhơl chờ Dăk Lăk geh gah lơh broă tơm priă jền kung mờr ndrờm bè broă lơh priă jền bơh oh dê sơl den tàng oh kờñ tơrlòng bơta pràn.

Cau lơh broă jòi broă lơh tàm Anih tờm yal tơngĭt broă lơh càr Dăk Lăk

Geh măt tàm dơ̆ ràng tơlik broă lơh tàm càr Dăk Lăk, ồng Lê Nguyên Phúc, Kwang ătbồ Cơldŭ lơh broă cau lơh broă bơh Kông ty Trác ñiệm Hữu hạn Hoa Xuân Vina dê sùm lơh gơlik khŏ tàp pràn să jan tàm tiah lơh sa mờ măy mok Nhơn Trạch, càr Đồng Nai pà gĭt, Kông ty neh lơh bal mờ càr Dăk Lăk rlau 7 nam do mờ neh ngui rlau 5 rbô nă cau lơh broă bơh càr dê. Tŭ do, kông ty kung gam pơgồp bal mờ ală gơnoar ătbồ càr do nàng rwah dùl khà uă cau kông ñân. Bi Lê Nguyên Phúc, yal: Kông ty gam geh jơnau kờñ jòi cau lơh broă bơh 1 rbô tus 2 rbô nă cau lơh broă ƀươn, sơnam bơh 18 rlau hơđang. Priă nhai bơh 6, 7 tơlak tus 14 tơlak đong, geh bal ală bơta dong kờl ndai bơh kông ty dê, bal mờ hơ̆ Kông ty geh ală bơta dong kờl bè jờng 3 tơlak đong ai cau lơh broă rơ̆p pa dơ̆ sơnrờp tus lơh broă, dơ̆ bàr là dong kờl hìu ơm apah tàm pơgăp 2 nhai ai cau lơh broă tus lơh broă tàm kông ty in mờ geh rơndeh lòt rò lòt jun...Sră nggal dan lơh broă ƀươn ngan lơh mìng kờñ pal geh Sră kim ta, sră yal rài kis hìu bơnhă geh top ƀăng kị là gơtùi lòt tus kông ty nàng lơh broă.

Jăt ồng Nguyễn Văn Cường, Phó Kwang ătbồ Anih tờm yal tơngĭt broă lơh càr Dăk Lăk dê yal, tàm qúy dùl, Anih do neh pơgồp bal bơyai lơh 26 dơ̆ ràng tơlik broă lơh tàm ală kơnhoàl, thị xã; yal tơngit broă lơh ai 2 rbô 223 nă cau in. Tŭ do, jơnau kờñ jòi cau lơh broă bơh ală mpồl lơh sa kă bro dê tàm dơlam mờ bơdìh càr là uă ngan. Ồng Nguyễn Văn Cường yal: Khà ală mpồl lơh sa kă bro cih mat jòi cau lơh broă bơh anih lơh broă do là uă ngan, tus tơngai do neh geh rlau 2 rbô mpồl lơh sa kă bro cih mat, tàm hơ̆ jơnau kờñ rwah cau lơh broă bơdìh càr là uă ngan mờ kờp jơh jơnau kờñ jòi cau lơh broă tus tŭ do là rlau 22 rbô nă. Bè jơnau jòi cau lơh broă tàm càr tus tơngai do den ală mpồl lơh sa kă bro neh lơh broă mờ rwah wơl cau lơh broă uă ngan rlau bal mờ rlau 2 rbô nă cau.

Ală kông ñân gam lơh broă tàm Kông ty Kổ phần Lòs tiah đah jum măt tơngai lik câu Á gơwèt Tiah lơh sa mờ măy mok Hoà Phú

Ồng Nguyễn Quang Thuân, Phó Kwang ătbồ Sở Lao động Thương ƀiñ mờ Xã hội càr Dăk Lăk pà git, bơh kờp sền, tus tơngai tŭ do geh pơgăp 90% khà cau lơh broă tơnơ̆ tŭ tơngai rê hờ ƀòn pleh kòp neh lòt lơh broă wơl tàm ală càr tiah đah jum dà lơgar. Khà cau lơh broă khăt gơboh gam wơl kung gam geh gơnoar ătbồ tiah do mờ ală anih lơh broă geh gơnoar dong kờl, yal tơngĭt nàng kờñ gờñ jòi geh broă lơh. Ồng Thuân đơs là, mờ drà rwah cau lơh broă gam uă ngan bè tŭ do, broă lơh geh broă rơndăp lơh bơsong broă lơh ai pơgăp 40 rbô nă cau in, tàm hơ̆ ai lòt lơh broă hờ lơgar ndai 1 rbô nă tàm nam 2022 là gơtùi lơm lơh geh. Ồng Thuân yal: Bol añ sơlơ tơnguh tai broă yal tơngĭt mblàng yal jơnau mờ tŭ do uă mpồl lơh sa kă bro kung neh hơ geh bơyai lơh broă lơh ală jơnau yal tơngĭt tàm ală xã. Dơ̆ bàr là gơwèt mờ cau lơh broă geh jơnau kờñ lơh broă tàm càr den tŭ do bol añ neh kĭ hơ mờ cribơyai lơh broă mờ kông ty Teakwang, là dùl kông ty geh bơyai lơh bơ̆t bơtàu tàm tiah lơh sa mờ măy mok Hoà Phú mờ jơnau kờñ rwah cau lơh broă bơh khi dê tàm nam 2022, 2023 là pơgăp 5 rbô nă. Broă lơh dơ̆ 3 là bol añ pal lơh pràn hòi jà bơcri priă nàng uă mpồl lơh sa kă bro geh priă FDI geh rề ơnàng broă lơh tơnơ̆ hơ̆ bơcri priă tàm Dăk Lăk nàng bơsong broă lơh. Bol añ kung pal kơlôi tus jơnau là jòi is broă lơh bơh cau lơh broă dê, tàm hơ̆ dong kờl priă nàng khi lơh sa is, jòi is broă lơh kung bè rề ơnàng broă lơh ai cau ndai in.

Cau cih Vũ Nam Trang- Cau mblàng Lơ Mu K’Yến