VOV4.K’ho- Pơrjum dờng kwang bàng ala măt dơ̆ 8, tơngai lơh broă bơh nam 2022- 2027 bơh Mpồl Cữ thập đỏ càr Dăk Lăk dê geh lơh tàm 2 ngai (20 mờ 21/06). Cồng nha pơnrơ ngan bơh Mpồl dê tàm tơngai lơh broă pa do là neh hòi jà tă pơgồp geh rlau 408 tơmàn đong ai ală broă lơh dong kờl kòn bơnus tàm càr, gơguh mờr bàr dơ̆ pơndrờm mờ tơngai lơh kơnòl broă lài hơ̆.

Tàm 5 nam do, Mpồl Cữ thập đỏ càr Dăk Lăk neh dong kờl mhar mờ dong kờl kòn bơnus ai rlau 868 rbô nă cau in, mờ kờp jơh priă mờr 342 tơmàn đong, bơh ală broă lơh bè srơh “Sa tềp tài cau rƀah mờ cau gơtìp sơnơm dioxin lơh aniai”, broă lơh “Pà kơnrồ”, broă lơh “Dong kờl jơnau kơ̆p kờñ”. Tàm tơngai tus, ală kâp mpồl cữ thập đỏ tàm Dăk Lăk pơn jăt tai lam lơh jăt geh cồng nha Dơ̆ hòi jà “Tơl mpồl cau, tơl nă cau gơ jăt bal mờ dùl anih dong kờl kòn bơnus”; lơh sùm ătbồ mờ bơtàu tơnguh Broă lơh dong kờl kơnrồ, dong ală hìu bơnhă rƀah geh broă lơh broă sa kơ̆ kơl jăp jŏ jòng; ală srơh, broă lơh “Sa tềp tài cau rƀah mờ cau gơtìp sơnơm khih dioxin lơh aniai”, “Nhai lơh broă dong kờl cau”, “Hìu trŭ gơm phan sa bơta nđàc”, “Preng piang tềng kơlik hìu”, sền gàr pràn kơldang să jan làng bol.

Cau mblàng Lơ Mu K’Yến