VOV4.K’ho- Di dơ̆ sa tềp bơhiàn dà lơgar Ñâm Zần 2022, Ủy ƀan Ñân zân càr Dăk Lăk neh geh kơrnoăt lời rlau 49 tơmàn 500 tơlak đong nàng còp mờ pà phan ai ală cau dùl nă să is, mpồl cau in, gơguh mờr 7 tơmàn đong pơndrờm mờ nam lài.

Kwang bàng đơng lam bồ càr Dăk Lăk jàu phan pà sa tềp ai làng bol xã Bông Krang, kơnhoàl Lăk in

Jăt mờ hơ̆, khà priă pà cau dùl nă is bal in là 300 rbô đong dùl nă; khà priă pà cau cíñ sac in, cau geh màng mờ dà lơgar in là 400 rbô đong dùl nă; khà priă pà cau ala măt hìu bơnhă ală cau cíñ sac in, cau geh màng mờ dà lơgar geh pơnrơ in là 500 rbô đong dùl nă; khà priă pà ală cau gam dờp bơta dong kờl pah nhai là 1 tơlak 300 rbô đong dùl nă. Bal mờ hơ̆, Ủy ƀan Ñân zân càr pà phan sa tềp mờ khà 2 tơlak 500 rbô đong tus 6 tơlak 500 rbô đong ai 407 mpồl lơh broă in, tàm hơ̆ geh: anih lơh broă ling klàng, kwang àng, mpồl ling sền gàr tiah nhàr lơgar, ală anih lơh broă sră pơ àr dà lơgar làng bol in, anih lơh broă sră pơ àr tàm càr mờ bàr pe anih lơh broă bơdìh càr.

Cau mblàng Lơ Mu K’Yến