VOV4.K’ho- Bơh bồ nam tus tŭ do, càr Dăk Lăk neh rò mờr 260 rbô dơ̆ nac lòt sền, nhơl chờ, uă ngan là nac tàm lơgar. Kờp jơh priă lơh geh bơh nhơl chờ kờp dŭ geh rlau 121 tơmàn đông. Tŭ do, càr gam lơh ngan lam lơh ală broă lơh nàng bơtàu tơnguh wơl nhơl chờ tàm bơta bè ờs pa.

Bơh nggùl nhai 3 pa do tơn, Ủy ƀan Ñân zân càr Dăk Lăk neh ai tơlik broă rơndap lơh pờ mpồng broă lơh nhơl chờ dunia mờ tàm lơgar bơh gùng ù gờl mờ gùng rơndeh par. Kờp sền mờ sền sơ wì bơta niam ală phan bơna nhơl chờ mùl geh tàm ală anih nhơl chờ. Jơh nùs hòi jà tàm tơrbŏ bal, pơn jờng jơnau kờñ nhơl chờ mờ ală càr, ƀòn dờng tàm lơgar mờ dunia. Bơt bơtàu ală phan bơna nhơl chờ pa, tàm tơrbŏ bal ală tiah nàng lơh gơlik ală tour, ală gùng nhơl chờ. Càr Dăk Lăk kung geh ală jơnau pơlam ngan ngồn tus ală mpồl lơh nhơl chờ, ală anih ơm wơl bè bơta chài boh bơr mờ nac nhơl chờ tŭ geh cau bơtờp kòp Kovid-19.

Cau mblàng K’Duẩn