VOV4.K’ho- Jat Sở Văn hóa, Thể thao mờ Zu lịc càr Dăk Lăk yal, tàm dơ̆ ơm rlô chờ ngai 30/4 mờ ngai 01/5 nam do, càr neh rò mờr 56 rbô dơ̆ nac lòt sền, ơm rlô să, priă lơh geh mờr 17 tơmàn đông, gơguh rlau 80% pơndrờm mờ dơ̆ ơm rlô chờ nam lài. Bơta pràn ngui cơldŭ ơpah kờp bal geh rlau 90%. Ală anih tac bro broă drơng ala ñô sa mờ ơm wơl ndrờm lơh jat broă yồng ƀàng cih khà priă mờ tac di mờ khà priă neh lir, ờ geh bơta tơnguh khà priă bơklơn nac nhơl chờ.

Nac lòt nhơl tàm tiah nhơl chờ Kŏ Tam

Mò Nguyễn Thuỵ Phương Hiếu, Kwang atbồ Sở Văn hóa, Thể thao mờ Zu lị càr Dăk Lăk đơs nền, nhơl chờ càr Dăk Lăk neh đal git bơta pràn he dê bè bơta kuơ nhơl chờ. Mờ càr neh bơt bơtàu kơrnuat pal jat bè niam chài boh bơr cau Dăk Lăk sơrmah sơrmài, rềp mềr mờ gàr kơ̆ mat kă bro he dê. Càr geh pơn jat tai sồr ală mpồl bal mờ Tổng kụk zu lịc lơh bè lơi bơt bơtàu phan bơna nhơl chờ pa, lơh pa ală phan nhơl chờ gam geh tŭ do. Kung bè tơnguh bơta niam bơto bơtê mpồl cau lơh broă, tơnguh broă lơh yal tơnggit, kĭ mờ ală càr, ƀòn dờng jơnau hơ pơrgon nàng lơh bè lơi gơtùi gơ hòi gơ jà nac tus mờ Dăk Lăk.

Cau mblàng K’Duẩn