VOV4.K’ho- Mìng gam 2, 3 ngai tai, mờr 480 rbô nă kơnòm bơsram ală kâp tàm càr Dăk Lăk geh mut tàm nam bơsram pa 2022- 2023. Tàm tŭ tơngai càr Dăk Lăk gam ờ tơl 1 rbô 260 nă cau pơgru, gah bơto bơsram tàm càr neh mờ gam rơcang lài bơt bơtàu ală broă rơndap lơh nàng kờñ gàr niam broă lơh bơto bơtê tàm nam bơsra pa do.

Càr Dăk Lăk tŭ do ờ tơl 670 nă pơgru mầm non

Nam bơsram 2022- 2023 do, Hìu bơsram kâp 1 Cư Pui 2, xã tiah ngài Cư Pui, kơnhoàl Krông Bông geh 1 rbô 400 nă kơnòm bơsram bơh ơdŭ 1 tus ơdŭ 5. Pơgru Nguyễn Hồng Thuần, kwang atbồ hìu bơsram yal, tŭ do hìu bơsram ờ tơl 8 nă cau pơgru: “Hìu bơsram geh 37 ơdŭ, kờp  ngan den dà Mỹ bơsram 4 tiết den ờ tơl 2 nă pơgru, ai Tin họk den kung ờ tơl 2 nă pơgru. Pa do, hìu bơsram neh dan Phòng Giáo zụk mờ Đào tạo kơnhoàl mờ neh pơrgum mờ geh ring bal broă rơndap lơh dan Phòng Nội vụ, Ủy ƀan Ñân zân kơnhoàl tơl môn bơ tơl 1 nă pơgru bơto dà Mỹ mờ Tin họk, gam ờ tơl 2 nă pơgru tai den hìu bơsram geh kĭ sră pơrgon lơh broă tơngai kàl mờ tŭ lơi geh broă jàu rơ wah cau lơh broă den geh kĭ sră pơrgon”.

Kơnhoàl Krông Bông tŭ do geh 51 hìu bơsram bơh mầm non tus kâp 2, mờ 21 rbô nă kơnòm bơsram gam bơsram. Ồng Huỳnh Viết Trung, kwang atbồ ing Phòng Giáo zụk mờ Đào tạo kơnhoàl pà git, gah bơto bơsram kơnhoàl tŭ do ờ tơl 133 nă pơgru, tàm hơ̆ uă ngan là pơgru mầm non mờ 80 nă, gam wơl là 53 nă pơgru kâp 1. Bulah gam ờ tơl uă ngan pơgru, mơya Phòng Giáo zụk mờ Đào tạo neh mờ gam rơcang lài bơt bơtàu ală broă rơndap lơh nàng kờñ gàr niam broă lơh bơto bơtê ai nam bơsram pa in. Ồng Huỳnh Viết Trung yal broă lơh: “Gơ wèt mờ kâp mầm non, bol hi geh tơrmù khà bơsram tàm ơdŭ nàng hòi jà khà kơnòm bơsram lik ơdŭ uă rlau, mờ khà kờp bal 1,5 nă pơgru bơto tàm ơdŭ, ờ rơndap ai jat tơl khà là 2 nă pơgru bơto tàm ơdŭ. Ai gơ wèt mờ kâp 1, bol hi kung gam gàr 100% ală hìu bơsram kung gam bơto môn Tin họk, dà Mỹ jat broă lơh bơto bơsram pa. Nàng gơtùi lơh broă do, Phòng geh lam lơh broă hòi jà bơta tă pơgồp bơh mpồl bơtiàn dê; dơ̆ 2 là geh tơrgùm wơl cau sa priă nhai nàng ngui khà jơngkah, mờ broă lơh dut ndơl là ală hìu bơsram dềt den pơgru tin họk, pơgru dà Mỹ pal lam lơh bơto bơsram tàm uă hìu bơsram nàng gàr niam ai nam bơsram pa in”.

Gùt càr Dăk Lăk tŭ do ờ tơl 1 rbô 260 nă pơgru bơh mầm non tus kâp 3

Ai tàm kơnhoàl Krông Buk, nam bơsram 2022- 2023 do kung geh mờr 14 rbô nă kơnòm bơsram gam bơsram bơh mầm non tus kâp 2 tàm 46 hìu bơsram. Ndrờm bè kơnhoàl Krông Bông sơl, gah bơto bơsram kơnhoàl Krông Buk kung gam ờ tơl 110 nă pơgru. Bulah bè hơ̆, ờ di bè Krông Bông, khà cau pơgru ờ tơl tàm Krông Buk ơm rah rài tàm jơh 3 kâp bơsram bơh mầm non tus kâp 2. Tàm hơ̆, mầm non ờ tơl uă ngan rlau jơh mờ 58 nă pơgru, kâp 1 là 38 nă, gam wơl là 18 nă pơgru kâp 2. Ồng Nguyễn Đình Khả, Kwang atbồ Phòng Giáo zụk mờ Đào tạo kơnhoàl yal bè broă rơndap lơh bơto bơtê bơh gah bơto bơsram kơnhoàl Krông Buk dê tàm nam bơsram pa 2022- 2023, tàm tŭ tơngai kơnhoàl gam ờ tơl pơgru uă ngan: “Phòng Giáo zụk ai tơlik jơnau đơs Ủy ƀan Ñân zân kơnhoàl in là broă rơ wah ờ hềt ai tơl jat khà bơh cau pơgru dê. Pơn yơu, gơ wèt mờ kâp mầm non ai là 2,2 mờ jơnau kờñ ngan ngồn là 2,0 nă pơgru bơto tàm ơdŭ den bol hi tơrgùm bơh 1,5 tus 1,6 nă pơgru bơto tàm ơdŭ nàng drơng broă bơto bơtê kơnòm in tàm ơdŭ. Kâp 1 là 1,5, he ai tơrmù pơgap 1,3 halà 1,2 gời. Kâp 2 den ờ tơl 18 nă, geh môn den ờ tơl, geh môn den jơngkah, bơta do gơtùi rơndap wơl mờ gơtùi ai bơto bơtê”.

Nam bơsram pa do, càr Dăk Lăk geh 478 rbô 180 nă kơnòm bơsram gam bơsram tàm 1 rbô 71 hìu bơsram bơh mầm non tus kâp 3 mờ hìu bơsram bơto sùm, hìu bơsram bơto broă lơh. Tŭ do, Dăk Lăk gam ờ tơl 1 rbô 260 nă cau pơgru.

Ồng Phạm Đăng Khoa, Kwang atbồ Sở Giáo zụk mờ Đào tạo càr Dăk Lăk pà git: “Gơ wèt mờ Dăk Lăk den gam kơp jàu khà bơ tơl bơh Cíñ phủ dê. Gah bơto bơsram neh ai tơlik jơnau đơs mờ Ủy ƀan Ñân zân càr tam pà geh jàu bơ tơl hơ̆ ai ală tiah gam ờ tơl uă pơgru in bè: Lăk, Krông Bông, Krông Buk, do là ală kơnhoàl rƀah. Broă bơ tơl geh ai lài kâp mầm non in. Ală tiah geh broă lơh sa bơtàu tơnguh rlau den tơrgùm tàm broă hòi jà bơta tă pơgồp bơh mpồl bơtiàn dê”.

Mờ bơta rơcang lài ai, rơndap tap sèng wơl mpồl cau pơgru tàm ală hìu bơsram, anih bơto bơsram kung bè ală broă rơndap lơh ndai tàm tŭ tơngai ờ tơl rlau 1 rbô 200 nă pơgru, gah bơto bơsram càr Dăk Lăk neh rơ cang wă rò kơnòm bơsram lòt bơsram wơl tàm nam bơsram pa.

Cau mblàng K’Duẩn