VOV4.K’ho- Dùl nam bơsram krơi is ngan bal mờ uă ngan tŭ jiơ bơsram bơh tàm internet, lơh uă kơnòm bơsram ơdŭ 12 tàm càr Dăk Lăk kơlôi rơcăng ngan ai dơ̆ pơrlòng jơh bơsram kâp pe nam 2022 in. Nàng ală oh iang nùs nhơm, ờ gŏ kơlôi rơcăng ir tàm broă bơsram, uă hìu bơsram kâp pe neh geh mhar geh gùng dà bơsram rơcăng ai dơ̆ pơrlòng jơh bơsram kâp pe ai ală oh in.

Tàm Hìu bơsram Kâp pe Lê Qúy Đôn, ƀòn dờng Buôn Ma Thuột, càr Dăk Lăk, rlau 530 nă kơnòm bơsram ơdŭ 12 mờr ndrờm bè bơsram bơh tàm internet tàm jơh gùt nam bơsram do. Nàng dong kờl kơnòm bơsram lồi kâp, hìu bơsram neh bơyai lơh sền swì sac rah bơta pràn jak bơsram bơh tơl nă oh dê nàng tam pà ơdŭ mờ geh broă rơndăp lơh bơto pơlam jơnau bơsram nền nòn loh làng. Dơ̆ pơrlòng jơh bơsram kâp pe nam 2022 kờp dŭ geh lơh bơh ngai 07 tus ngai 11/07/2022.

 Tàm tŭ dilah bơta kòp gơbàn kal ke tàm ală tiah, dơ̆ pơrlòng jơh bơsram kâp pe geh tơn rŭc wơl bơyai lơh gơs uă dơ̆ krơi is ndrờm bal bè dơ̆ pơrlòng jơh bơsram kâp pe nam 2021. Tus tơngai do, uă hìu bơsram kâp pe tàm càr Dăk Lăk neh rơcăng lài ală gùng dà broă lơh rơcang bơsram ai kơnòm bơsram in nàng ală oh pin dờn mŭt tàm dơ̆ pơrlòng bal mờ cồng nha lơh geh niam ngan rlau jơh.

Cau mblàng Lơ Mu K’Yến