VOV4.K’ho- Ờ hềt tus dùl nhai tai, kơnòm bơsram ală kâp bơsram tàm càr Dăk Lăk geh mut tàm nam bơsram pa 2022- 2023. Nàng gàr niam broă lơh bơto bơtê mờ bơsram, broă rơcang lài phan bơna gam geh ală tơnguh lơh mhar, rơcang lài ală rơndap broă lơh rơcang gàr lài, gàr niam bơto bơsram geh lơh sùm tàm tơl bơta gơlik geh.

 Ală ngai bồ nhai 8 do, tàm Hìu bơsram kâp 1 Cư Pui 2, sơnĕ hìu bơsram Ea Rớt, tiah sar lơgar ngài Cư Pui, kơnhoàl Krông Bông hìu jơnhua 2 cờn 6 cơldŭ bơsram mờ 2, 3 cơldŭ lơh broă gam jal mhar lơh rơkàng. Ală cơldŭ bơsram yau mờ hìu bơsram neh geh sờng wơl sir jơh; tàm ală cơldŭ bơsram, kơ ƀàng, cơ gĕ, kơ ƀàng cih mờ ală phan ngui bơto bơsram kung geh rơcang lài wil tơl.

Pơgru Nguyễn Hồng Thuần, kwang atbồ Hìu bơsram pà git, nam bơsram do, 3 sơnĕ bơh hìu bơsram kâp 1 Cư Pui 2 dê geh mờr 1 rbô 400 nă kơnòm bơsram. Tŭ do, 2 sơnĕ hìu bơsram rềp tiah tờm Ủy ƀan Ñân zân xã neh neh rơcang sir jơh phan bơna, mìng gam hìu bơsram Ea Rớt kung gam tàm tơngai rơcang lài, pal tus lồi nhai 12 hơ̆ sồng lơh sir. Nàng gàr niam broă lơh bơto bơsram tŭ phan bơna ờ hềt lơh sir, ờ hềt wil tơl, hìu bơsram neh rơcang lài nền nòn broă rơndap lơh rơcang gàr lài: “Tŭ do, lơh 6 cơldŭ bơsram jơnhua cờn mơya ờ hềt gơs, pal tus bồ tơngai bơsram dơ̆ 2 hơ̆ sồng lơh gơs mờ geh ntrờn ai mut bơsram. Tềng đap mat, hìu bơsram geh dùl cơldŭ  lơh mờ ndàp mờ geh ngui cơldŭ do nàng lơh cơldŭ bơsram ing; bơdìh hơ̆ tai den kung lơh sră yal dan mờ Ủy ƀan Ñân zân kơnhoàl dan tă priă blơi tai 30 nơm kơ ƀàng cơ gĕ pa mờ neh geh ring bal ai mờ tŭ blơi kung tơmut jơh tàm hơ̆”.

Nam bơsram 2022- 2023, kơnhoàl Krông Bông geh 51 hìu bơsram bơh mầm non tus kâp 2, bal mờ 21 rbô nă kơnòm bơsram. Ồng Huỳnh Viết Trung, kwang atbồ ing Phòng Giáo zụk mờ Đào tạo kơnhoàl pà git, nàng rơcang lài ai nam bơsram pa in, Ủy ƀan Ñân zân kơnhoàl Krông Bông neh ai mờr 24 tơmàn 500 tơlak đông nàng lơh pa 66 cơldŭ bơsram; ai uă bơnah priă bơcrai ndai nàng lơh niam wơl git nđờ rhiang cơldŭ bơsram yau; blơi phan bơna, măi mok, kơ ƀàng, cơ cĕ drơng broă bơto bơtê mờ bơsram. Tus tŭ do, jơh bơsram ndrờm lam lơh niam di tŭ tơngai hơ pơrgon mờ broă rơndap lơh ai tơlik: “Bè rơcang lài phan bơna nàng rơcang lài ai nam bơsram 2022- 2023 in den Phòng Giáo zụk mờ Đào tạo kơnhoàl neh rơcang lài broă lơh tơrgùm kờp nam lài, bơt bơtàu broă rơndap lơh bơh ngài, tơnơ̆ hơ̆ yal Ủy ƀan Ñân zân kơnhoàl ring bal, kuơmàng là ală xã ngài tàm dơlam. Tŭ do, 2, 3 hìu bơsram neh lơh gơs, gam 2, 3 hìu bơsram gam sơrbac mhar lơh sir nàng lơh bè lơi tus nhai 9 nam do gơtùi lơh gơs, rơcang mut tàm nam bơsram pa”.

Kơnòm bơsram pơs wàs hìu bơsram rơcang mut nam bơsram pa

Ai tàm kơnhoàl Lăk, nam bơsram 2022- 2023, kung geh mờr 13 rbô nă kơnòm bơsram ală kâp bơh mầm non tus kâp 2. Ồng Nguyễn Văn Ngọc, Kwang atbồ Phòng Giáo zụk mờ Đào tạo kơnhoàl yal, broă lơh niam phan bơna, ai priă blơi phan bơto bơsram geh Phòng tơlik broă rơndap lơh tus ală hìu bơsram bơh bồ nam tơn. Tŭ mut tàm kàl rlô bơkang, Phòng sồr ală hìu bơsram rơcang lài is, gơ jat tàm bơta geh ngan priă tă ngui sùm geh ai nàng lam lơh ală bơnah broă lơh niam wơl; lơh ngan chul chồl, sền sơ wì ală broă geh lơh pa nàng gàr niam tŭ tơngai hơ pơrgon; geh broă rơndap lơh rơcang lài nàng lơh bè lơi dilah geh broă lơh ờ thàn lơh gơs den broă bơto bơsram kung gam geh lơh sùm: "Phòng Giáo zụk mờ Đào tạo geh lơh tờm broă bơcri priă lơh niam 3 hìu bơsramn mờ 1 tàm khà hơ̆ neh lơh gơs, gam 2 hìu bơsram tai gam geh lơh sir mờ tus ngai 15/8 kung geh lơh jơh broă lơh niam wơl. Tŭ do, mìng gam ală broă lơh dờng den broă lơh sir digơlan lơyài rlau, tus tơnơ̆ nhai 9 tus, mờ broă do Phòng kung rơcang lài pơgồp bal mờ ală hìu bơsram bơt bơtàu broă rơndap lơh tềng đap mat là ai kơnòm bơsram bơsram tơn tàm ală cơldŭ bơsram yau halà kung gơtùi tam pà bơsram gơs 2 dơ̆ tàm ngai. Sền bal nàng gàr niam broă lơh bơto bơsram”.

Jat Sở Giáo zụk mờ Đào tạo càr Dăk Lăk yal, nam bơsram 2022- 2023, gùt càr geh 478 rbô 180 nă kơnòm bơsram bơsram tàm 1 rbô 17 hìu bơsram bơh kâp mầm non tus kâp 3. Nàng gàr niam phan bơna ai nam bơsram pa in, Ủy ƀan Ñân zân càr neh ai mờr 477 tơmàn đông bơcri lơh pa mờ blơi phan bơna, măi mok drơng broă bơto bơtê mờ bơsram. Tàm hơ̆, mờr 389 tơmàn đông geh ngui nàng lơh pa 350 cơldŭ bơsram, lơh niam wơl 170 cơldŭ bơsram pa, lơh pơng gàr, ƀlàng nhơl, mpồng hìu bơsram ai uă hìu bơsram in; mờr 88 tơmàn đông geh ngui nàng blơi kơ ƀàng, cơ ge, kơ ƀàng cih mờ uă phan bơto bơsram ndai.

Cau mblàng K’Duẩn