VOV4.K’ho - Tây Nguyên gam tàm nggùl kàl prang. Tàm càr Dăk Lăk, geh ờ uă bă ù tam phan gơtìp ờ tơl dà tuh. Tềng đăp mờ bơta do, jơh gùt gah, mpồl lơh broă geh gơnoar bal mờ làng bol gam lơh ngan lơh jăt ală broă rơcang sơndră mờ trồ prang phan tam in.

Nàng sơndră mờ trồ prang, gah lơh broă geh gơnoar tàm càr Dăk Lăk bơto sồr làng bol tuh tềm dà pleh mờ hoàc huơr

Ồng Nguyễn Văn Đa, kis tàm thôn 2, xã Cư̆ Mgar geh 1 lồ 5 sào ù tam bơrlŭ bal 700 tòm kơphe mờ 300 tờm tiêu, mờ rơlao 50 tờm sầu riêng. Nàng tuh dà phan tam in, ồng neh tờ tơnao dà ơnàng 700 thơ̆k vuông, jrô rơlao 8 thơ̆k nàng prăp dà mờ khoàng tai 1 tơrlung dà jrô 90 thơ̆k. Ồng Đa pà git, tŭ do kơphe gam mŭt tàm dơ̆ tuh dà dơ̆ 2, tờm tiêu kung kờñ tuh dà sơl, mơya tŭ do dà tàm tơnao neh soăt, pal ngui dà bơh tơrlung nàng tuh phan tam in. “Tơnao dà añ den tus kàl prang là soăt dà. Hìu nhă pal khoàng tai tơrlung mờ rơcang tuh mờ dà bơh tàm tơrlung do tus jơh kàl prang. Tŭ tuh kơphe den sùm tềm dà, ngui broă tuh tơn tềng tờm, he pal tuh tơl bơtô di pơgăp 200 lít, bơtô bềng den tuh tàm bơtô ndai. Bè tuh dà tờm tiêu in, añ tam gơl tuh jăt ntờc nàng tềm pềr dà”.

    Uă broă lơh bơtơ̆t dơng dà tàm càr Dăk Lăk sơnđờm gơmù dà bŭ lah kàl prang gam 2 nhai tai hơ̆ sồng jơh

Kơnhoàl Cư̆ Mgar tŭ do geh rơlao 64 rơbô 500 lồ ù tam phan, tàm hơ̆ geh mờr 52 rơbô lồ ù tam phan jŏ tơngai, tàm hơ̆ geh: kơphe, tiêu, kao su mờ ală bơta tờm chi sa plai; rơlao 12 rơbô 500 lồ ù tam phan pah nam bè kòi, tơngời, bùm lô, bùm mblàng, khoah, biăp… Ồng Ngô Xuân Biện, Phó kwang atbồ Phòng Nông nghiệp mờ Phát triển Nông thôn kơnhoàl Cư̆ Mgar yal, tŭ do tàm kơnhoàl neh gơtìp ờ uă bă ù tam phan tàm ală xã Cư Mgar, Ea Mdroh, Ea Tar, Quảng Hiệp, Cư̆ Dliê Mnông ờ tơl dà tuh… Phòng neh dan mờ UɃÑZ kơnhoàl nàng đơng lam ală xã chồl pràn broă lam sồr tus mờ làng bol pal ngui dà tềm pềr, mờ bơ̆t bơtàu rơndăp broă tam pà dà di pal tàm ală broă lơh bơtơ̆t rơbòng dà drơng tàm broă tuh phan tam in. “Nàng gàr tơl khà dà tuh ai phan tam in tus lồi kàl prang, Phòng Nông nghiệp mờ Phát triển Nông thôn kơnhoàl neh dan mờ UɃÑZ kơnhoàl đơng lam ală xã sền wơl ală broă lơh bơtơ̆t rơbòng dà tàm xã, bơ̆t bơtàu tơngai tam pà dà di pal tus tơl tiah nàng gàr tơl dà tus mờ ală suơn tam phan, sre lơh kòi, pleh mờ broă gơtìp hoàc huơr dà. Bơto sồr làng bol pal tuh dà tềm pềr, toah wàs rơbòng dà, kơrian, bơtơ̆t ală tơnao dềt hìu nhă tờm nàng prăp ngui dà tuh”.

Kông ty TNHH MTV atbồ broă lơh bơtơ̆t rơbòng dà càr Dăk Lăk gam atbồ 341 broă lơh bơtơ̆t rơbòng dà, tàm hơ̆ geh 247 tơnao dơng dà, 13 anih ƀồm mờ 82 bơtơ̆t lìu dà. Ală broă lơh bơtơ̆t dơng dà do drơng tàm broă tuh dà ai mờr 80 rơbô lồ phan tam tàm càr Dăk Lăk in.

Jăt ồng Nguyễn Công Hạnh, Phó kwang atbồ kông ty yal, bơh broă sền gròi den gŏ geh 118 tàm 247 tơnao dơng dà geh khà dà bè ờs, 118 tơnao dơng dà geh bơh 70 tus 90%, 8 tơnao dơng dà tàm khà bơh 50 tus 70% mờ 3 tơnao dơng dà gam tai hờ đơm 50%. Kờp dŭ tiah kờñ drơng broă tuh dà bơh kông ty geh di pơgăp 1 rơbô 200 lồ ù tam phan gơtìp prang, tàm hơ̆ geh mờr 600 lồ kòi, gam tai là ală bơta phan tam ndai, tơrgùm mìng tàm ală kơnhoàl Cư̆ Mgar, Buôn Đôn, Krông Năng, thị xã Buôn Hồ mờ ƀòn dờng Buôn Ma Thuột. Tŭ do kông ty gam pơgồp bal mờ gah lơh broă geh gơnoar nàng bơ̆t bơtàu ală gùng dà broă lơh, rơcang cau lơh broă, phan lơh broă, măi mŏk nàng rơcang sơndră mờ trồ prang phan tam in. “Tŭ do bol añ neh bơ̆t bơtàu ală gùng dà broă lơh nàng tơrgùm sơndră mờ trồ prang ai ală bơta phan tam in. Lài ngan, ngui ƀào ù bơ̆t tềng bơtơ̆t lìu nàng gàr tai dà tàm ală tơnao dơng dà, dơ̆ 2 ngui ƀồm ngui jơh ală dà tàm ală tơnao neh soăt nàng tuh kòi mờ ală bơta phan tam ndai in. Rơcang tơl ală bơta phan măi mŏk, ƀồm ntrờn, jờu prăp nàng tŭ tơngai trồ prang dờng tàm lồi nhai 3 ha là bồ nhai 4 di lah gơtìp den he neh geh nàng sơndră. Gùng dà sơndră mờ trồ prang geh bol añ rơcang nền nòn ngan, tŭ lơi kung rơcang lài mờ lơh ngan lơh geh cồng nha nàng pleh mờ hoàc huơr ai làng bol in”.

Cau cih Tuấn Long- Cau mblàng Ndong Brawl