VOV4.K’ho- Broă lơh pơrlồm tăc phan dờp priă wơl, dùl broă lơh gơ lơh bè pơr lồm neh gơlik geh ờ dùl ết dơ̆ tàm ală tiah lơh uă cau roh priă jền mờ neh geh gah mblàng yal jơnau sùm tơngkah lài tàm uă tiah. Mơya, broă lơh blăc pơrlồm do pa gơlik geh tai tàm ƀòn dờng Buôn Ma Thuột, càr Dăk Lăk dê.

At tàm tê glah chàng ờ gơđềt blơi mờ giă 650 rơbô đong mơya ngui dùl dơ̆ neh gơ plồ jơh tăp lơh ờ đềt, mò H’Lý Niê, ơm tàm ƀòn Êrang, sơnah ƀòn Khánh Xuân, ƀòn dờng Buôn Ma Thuột, càr Dăk Lăk, ñìm jài mờ đơs jài: “añ neh gơtìp pơrlồm”. 

Bi H’Nghiêm Niê yal wơl broă gơtìp pơrlồm roh mờr 5 tơlak đong

Bồ poh do, geh bàr pe nă cau ờ gĭt muh mat mŭt tàm ƀòn phàt sră bè dùl broă lơh ngui sền gĭt phan bơna phan ngui tàm broă drơng broă trŭ gơm bal mờ jơnau hơ pơrgon gơ kờñ ngan là geh dờp priă wơl. Tus bal broă lơh do, mò ai 3 phan bơna tàm hơ̆ geh, glah chàng ờ gơ đềt, glah áp suất mờ glah gơm lẩu, mơya ờ hềt “sền gĭt” phan do den neh roh mờr 5 tơlak đong. Mò H’Lý Niê, đơs: "Bơh sơn rờp khi ngkoàc glah do tàm siêu thị ờ geh, ai giă tăc tàm do là 4 tơlak 100 rơbô đong. Den hơ̆ sồng ồng hơ̆ đơs là 4 tơlak 100 rơbô đong geh cau lơi blơi sơl, dilah blơi den priă ờ gŏ roh, dùl ết tai den dờp priă wơl. Tơnơ̆ hơ̆ den tus glah chàng 650 rơbô đong. Ờ kơlôi là pơrlồm halà ờ gŏ pơrlồm. Broă ờ hềt jơh, añ kung ờ hềt sền phan bơna bè lơi sơl, ờ hềt thàn dờp wơl mờ nisơna bol do neh ntoăt dô jơh, tŭ hơ̆ hơ̆ sồng gĭt là he neh gơtìp pơrlồm".

Gĭt nđờ jơ̆t nă làng bol ƀòn Êrang ờ suk ơm tài bơh gơtìp pơrlồm

Kung la cau gơtìp pơrlồm tàm broă lơh ngui phan bơna geh bơyai lơh tàm dùl hìu drơng broă ñô sa tàm sơnah ƀòn Khánh Xuân tàm drim ngai 4/10, bi H’ Nghiêm Niê ơm tàm ƀòn Êrang yal, broă lơh do mìng lời ai cau ùr in lơm, cau klau ờ gŏ ai mŭt. Bơh sơn rờp, bi blơi bàr pe nơm phan bơna bè dà màn, dà sơbơng rào bơngàn, sơbong pìh phan mờ giă bàr pe rơhiang rơbô đong mờ ndrờm geh dờp wơl priă. Tus mờr klo ngai, ală cau do yal geh tăc ală phan bơna geh priă jền uă mờ kung geh jàu wơl priă jền ai cau blơi in. Bi H’ Nghiêm neh mhar ngan rê tàm ƀòn càn 5 tơlak đong nàng blơi, den nrơ̆t ngan sền gŏ ală mpồl cau do mŭt tàm rơndeh ôtô mờ ntoăt dô.

Bi H’ Nghiêm Niê đơs: "Làng bol he kơ̆p sùm mờ ờ gŏ dờp priă wơl, den hơ̆ sồng sền gŏ cau lơh broă bơh lài rŭc jơh đah ngkời, den bol khi ntoăt dô jơh. Khi apah bàr pe nă cau lơmă bè bol blơ̆ ơm kơ̆p lài tềng mpồng hìu drơng broă ñô sa Thu Hương dê, den hơ̆ sồng khòm jơh phan ntoăt dô jơh, priă den ờ gŏ dờp wơl".

Ồng Y Hiệp Niê, Kwang atbồ ƀòn Êrang, sơnah ƀòn Khánh Xuân, pà gĭt, ală phan bơna mờ làng bol cèng rê geh bơta ờ niam mờ ờ gĭt loh tiah tờm lơh gơlik. Ồng Y Hiệp Niê, đơs: "Kông ty, mpồl lơh sa kă bro do pơrlồm làng bol. Do kung là jơnau bơsram ai làng bol tàm ƀòn in. Kung kơ̆p kờñ anih lơh broă geh gơnoar, anih lơh broă Kwang àng bơsong broă do ai làng bol in". 

Glah chàng ờ gơ đềt ngui dùl dơ̆ neh gơ plồ jơh tăp ờ gơđềt

Ồng Nguyễn Đình Chung, Củ tịc Ủy ƀan Ñân zân sơnah ƀòn Khánh Xuân, ƀòn dờng Buôn Ma Thuột, pà gĭt, dờp jơnau yal bơh làng bol dê, kwang atbồ tiah do neh tus tiah bơyai lơh den mpồl cau tăc phan do neh dô rê tĕ. Jat jơnau sền gĭt bơh sơn rờp, broă lơh do geh pơgap 500 nă cau gơwèt sơnah ƀòn Khánh Xuân mờ ală xã Hoà Xuân, Hoà Khánh, Hoà Phú tus bal. Cau blơi ết ngan rlau jơh là 650 rơbô đong, ai cau blơi uă ngan là mờr 9 tơlak đong.

Mpồl cau tăc phan do tàm hơ̆ geh 2 nă cau ùr, 8 nă cau klau ngui rơndeh dờng geh ƀàng sồ 60B-04422 mờ rơndeh ôtô 16 cơ ghĕ mờ ƀàng sồ 60B-52809. Lài hơ̆, ală cau do neh yal is là cau ala mat Kông ty TNHH ISHIBA, tus ală tiah geh gal làng bol bè: drà, mpồng hìu bơsram... phàt sră pang, sră jà tus bal broă lơh sền gĭt phan bơna. Ồng Chung đơs ngan, broă bơyai lơh broă lơh do ờ gŏ dan mờ gơnoar atbồ tiah do dê.

Ồng Nguyễn Đình Chung, đơs: "Bơta hơ̆ là tìs ngan rao, tài bơh tăc phan den jat dùl broă lơh mìng dùl lơm, ờ gơtùi yal tơngĭt phan bơna den tăc phan bè hơ̆ ờ. Tơnơ̆ tŭ lơh broă den Hìu drơng broă ñô sa kung nrơ̆t sơl, tài bơh mpồl cau tăc phan do lòt apah tiah do nàng tăc phan den khi ờ gŏ gĭt là tăc phan lơi mờ pơrlồm làng bol bè hơ̆. Tŭ do, đah xã kung gam sồr ală anih lơh broă geh gơnoar, tàm hơ̆ geh cau tờm là kwang àng sền sơ wì, sền gĭt, lơh loh broă do ờ gŏ di nàng lời làng bol gơtìp pơrlồm bè hơ̆ ờ".

Gĭt nđờ rơhiang nă làng bol ơm tàm ƀòn dờng Buôn Ma Thuột, càr Dăk Lăk tơn neh gơtìp pơn jồ tus bal dùl broă lơh sền gĭt phan bơna mơya ngan ngồn là dùl broă lơh pơrlồm tăc phan. Broă lơh blăc pơrlồm do ờ gŏ di pa ờ mơya pà gŏ ală bơta ờ pràn tàm broă atbồ kă bro mờ sền gàr lơngap lơngai, rơndap tap sèng tàm ală tiah dê, tŭ dùl broă lơh geh bơyai lơh hô hơng, tơrgùm uă ngan làng bol mơkung ờ gŏ gĭt mờ kơryan di tŭ.

Cau cih Công Bắc- Cau mblàng K’Hạnh