Mùl màl, rơ̆p geh cau ala măt bơh 7 Đại sứ quán, 5 Tổng lãn sự quán mờ bàr pe càr bơh ală lơgar: Mông Cổ, Campuchia, Hàn Quôk, Lào mờ ală mpồl cau, anih lơh broă sră ƀăo, mpồl lơh sa kă bro dunia dê. Bal mờ tus bal bàr pe broă lơh tờm bơh Dơ̆ lơh chờ dê, ală mpồl rơ̆p lòt còp bàr pe broă lơh tam sầu riêng, broă lơh lơh sa, lơh gơlik kơphê mờ bàr pe tiah nhơl chờ bơh càr Dăk Lăk dê.

Mìng is bàr mpồl đơs crih tam ya càr Champasak, lơgar Lào dê; Jeollabuk, lơgar Hàn Quôk dê neh cih mat dan tus bal Dơ̆ lơh chờ gùng drà mờ lơh đơs crih tam ya tàm bàr kơnhoàl: Lăk mờ Buôn Đôn. Mpồl bơyai lơh Dơ̆ lơh chờ neh sồr ală sở, ngàñ, mpồl lơh broă geh gơrềng lam lơh broă lơh wă rò năc, drơng broă wil tơl ală mpồl năc dunia in tŭ tus bal Dơ̆ lơh chờ Kơphê Buôn Ma Thuột dơ̆ 08 nam 2023.