Sền swì broă lam lơh jăt ală broă lơh jơnau kờñ dà lơgar tơngai bơh nam 2021- 2023, broă lơh, kơnòl broă tờm tơngai bơh nam 2023- 2025 mờ pơlam gùng dà lam lơh jăt tàm tơngai bơh nam 2026- 2030. Jăt khà kờp geh yal tàm pơrjum, lơh jăt 3 broă lơh jơnau kờñ dà lơgar dê, Dăk Lăk neh geh jàu 2 rbô 319 tơmàn đong priă jền, geh tus 50,91% kờp jơh priă jơh gùt tơngai bơh nam 2021- 2025 dê. Ală broă lơh jơnau kờñ dà lơgar neh pơgồp bơnah lơh mhar tŭ tơngai bơ̆t bơtàu ƀòn lơgar pa mờ tơrmù rƀah tàm càr Dăk Lăk. Khà hìu rƀah jơh gùt càr gơmù bơh 1,5 tus 2%/dùl nam; hìu rƀah tàm tiah làng bol jơi bơtiàn dùl êt nă cau gơmù bơh 3 tus 4%/dùl nam.

Kung jăt jơnau đơs tàm pơrjum sơl, broă lơh jăt 3 broă lơh jơnau kờñ dà lơgar tàm càr Dăk Lăk gam uă kal ke, ờ hềt dipal...Tơngai tus, càr rơ̆p lơh ngan tă bơsong ală kal ke bơta ờ hềt dipal, nàng ală broă lơh lơh geh cồng nha uă ngan rlau jơh. Tàm hơ̆, broă ù ơm ù lơh sa tàm tiah làng bol jơi bơtiàn dùl êt nă cau in rơ̆p geh càr ai lài sền swì, lơh bè lơi ai làng bol jơi bơtiàn dùl êt nă cau in kơ̆ kơl jăp rài kis.