Ngai 19/05/2024 là dồ ngai kah ngan gơ wèt mờ Y Jer Kpơr, kơnòm bơsram ơdŭ 12, Hìu bơsram Kâp pe Nguyễn Bỉnh Khiêm, kơnhoàl Krông Păch, càr Dăk Lăk tŭ geh yal bơr sơntơm să tềng đăp bồng bi Đảng dê. Y Jer Kpơr pà gĭt, ală tŭ bơsram jơnau kah yau Đảng dê, bè krơh ală đảng viên kăc màng dồ nùs kơ̆ dơn ơm ơm tàm mpồl Đảng dê, Y Jer sơlơ chờ hờp ngan, jơh nùs lơh ngan tàp bơsram rlau tai, gơgơs làng bol niam, đảng viên lam lài nàng dong kwơ ai làng bol ƀòn lơgar in. Y Jer Kpơr, đơs: Lài ngan den añ gam kơnòm, là dồ nă đảng viên pa mŭt đảng, den tàng bơh sơnrờp pal là bơtàu tơngguh să tờm he nàng gơs dồ nă đảng viên niam rlau, nàng tơnơ̆ do he bơtàu tơngguh he jak chài den he wơl rê wơl hờ ƀòn lơgar he dê, dong kờl bơtàu tơngguh lơh sa, niam chài mờ sang tĕ ală broă iơh lơh gơrềng tus làng bol ƀòn lơgar he dê.

Kung chờ hờp ngan geh ơm tàm mpồl Đảng dê di dơ̆ tơngkah kir sơnrai 134 nam Ngai deh Củ tịc Hồ Chí Minh, tŭ pa pơrlòng gơ kờn tàm Hìu bơsram Đại họk Kinh tế ƀòn dờng Hồ Chí Minh, oh Trần Phan Tường Vy ờ gơtùi mpồn geh bơta chờ hờp mờ pơñiờ să ngan. Tường Vy yal, broă geh tơmŭt Đảng dong oh geh tai bơta gơn kơnờm nàng pơn jăt tai pơnđơl pràn, tàp bơsram tàm ală nam bơsram đại họk mờr tus. Oh Trần Phan Tường Vy, đơs: Geh tơmŭt tàm Đảng Kộng sản Việt Nam den añ gŏ he geh kơnòl rlau, mờ gơnoar broă là dồ nă đảng viên den he rơ̆p geh bơta gơn kơnờm nàng lơh ngan pah ngan, nàng lơh sir niam să tờm he uă rlau, nàng drơng broă ai dà lơgar in.

Jăt ùr pơgru Nguyễn Thị Mai Phương, Phó Ƀí thư Ci ƀộ, Phó Kwang ătbồ Hìu bơsram Kâp pe Nguyễn Bỉnh Khiêm, kơnhoàl Krông Păch, càr Dăk Lăk yal, ală nam rềp ndo, broă lơh tơmŭt Đảng gơ wèt mờ kơnòm bơsram geh hìu bơsram sền gròi mờ lơh geh cồng nha uă. Bơh nam 2020 tus tŭ do, hìu bơsram neh tơmŭt Đảng ai 19 nă kơnòm bơsram jak ngan pơnrơ ngan in. Ùr pơgru Nguyễn Thị Mai Phương, đơs: Bơh nam 2019, Mpồl Rơndăp broă Huyện ủy dê geh bơto pơlam tơmŭt Đảng tàm sơnam kơnòm bơsram den Ci ƀộ bol hi sền gròi ngan bè broă do mờ bol he sồr jơnau dồ nă kơnòm bơsram geh yal tề lam nàng gơgơs là đảng viên den jơnau lài ngan là ală oh geh cồng nha bơsram sră pal jak, nùs nhơm pal niam. Bol hi geh ală cau niam ngan den hơ̆ sồng rơ̆p jàu tai ai đah Đoàn hìu bơsram in pơn jăt tai tề lam mờ ai ală oh in lơh bal uă srơh nàng sền gŏ geh uă jơnau tơl pràn bơh ală oh dê.

Tơngai lơh broă bơh nam 2020- 2025, Huyện ủy kơnhoàl Krông Păch pơnđơl pràn tơmŭt geh 100 nă đảng viên tàm ală hìu bơsram Kâp pe mờ Anih tờm Bơto bơtê broă lơh- Bơto bơtê sùm. Kờp tus nhai 06 nam 2024, Huyện ủy kơnhoàl Krông Păch neh tơmŭt geh 83 nă đảng viên pa là làng bol jak ngan gam bơsram tàm ală hìu bơsram Kâp pe tàm ù tiah kơnhoàl dê. Tàm hơ̆, nam 2023 neh tơmŭt geh 25 nă kơnòm bơsram; 6 nhai bồ nam 2024 geh 29 nă kơnòm bơsram geh tơmŭt Đảng. Ồng Trần Hồng Tiến, Ƀí thư Huyện ủy kơnhoàl Krông Păch, càr Dăk Lăk pà gĭt, broă tơmŭt đảng viên tàm ală hìu bơsram neh dong lơh kơnòm mpồl đảng viên tàm kơnhoàl dê. Tŭ rê pơrjum tàm mpồl đảng tàm ƀòn lơgar, ală oh geh kâp ủy ƀòn lơgar pơn jăt tai tề lam, dong kờl nàng gơs là ală cau jơh nùs. Ồng Trần Hồng Tiến, Ƀí thư Huyện ủy kơnhoàl Krông Păch, càr Dăk Lăk, đơs: Tơmŭt Đảng tàm do ờ gŏ di là tơmŭt ai ci ƀộ, ai đảng ƀộ bơh kơnhoàl dê lơm in ờ mờ là tơmŭt đảng ai mpồl đảng in. Jòi ai mpồl Đảng in ală đảng viên jak ngan rlau jơh, pơnrơ ngan rlau jơh. Tŭ do dilah bol he rwah geh ală oh đoàn viên jak ngan, bơsram jak ngan tàm ală hìu bơsram nàng tơmŭt đảng, tơnơ̆ hơ̆ yal tơnggĭt ală oh tàm ală hìu bơsram Đại họk nàng pơn jăt tai dong kờl, tề lam den geh ală oh cau bơsram dờng là đảng viên. Mờ tơnơ̆ tŭ ală oh lik klờng mŭt lơh broă tàm ală anih lơh broă dà lơgar dê den bol he neh geh ală đảng viên jak ngan bè hơ̆.

Broă lam tơmŭt đảng tàm hìu bơsram Kâp pe tàm kơnhoàl Krông Păch, càr Dăk Lăk geh bơta kwơ gĭt gŏ, cih dờp ală broă lơh ngan bơh ală kơnòm bơsram jak ngan dê mơkung lơh geh geh tiah nàng tơmŭt Đảng tàm mpồl cau kơnòm să, pơgồp bơnah tơngguh uă cồng nha mpồl đảng viên mờ bơtơl mpồl cau lơh broă pa, geh broă lơh jak ai Đảng in.