VOV4.K’ho- Dăk Lăk là càr geh uă bơta ƀuơn nàng bơtàu tơnguh lơh sa suơn sre. Tàm Nghị quyết pơrjum dờng Đảng ƀộ càr dơ̆ 17, tơngai lơh broă bơh nam 2021 tus nam 2025 neh đal git bơtàu tơnguh rài lơh sa suơn sre jat gùng dà geh bơta niam uă, kơ̆ kơljap sùm là 1 tàm 6 kơnòl broă tờm nàng bơtàu tơnguh lơh sa càr dê. Tàm ală nam do, càr neh geh uă gùng dà, broă lơh gơ hòi gơ jà bơcri priă tàm gah lơh sa suơn sre. Kuơmàng là lơh sa suơn sre ngui kông nghệ kao. Nàng bơt bơtàu rài lơh sa suơn sre jat gùng dà tam gơl pa, kơ̆ kơljap sùm den càr gam pơn jat tai tơnguh gơ hòi gơ jà bơcri priă tàm gah do.

Mờ bơta kơp kờñ lơh gơlik phan bơna bơh suơn sre rềp mềr mờ tiah ơm kis, sền gàr pràn kơldang să jan cau ngui sa, Kông ty Kổ phần Ban Mê Green Farm tàm sơnah ƀòn Tân Thành, ƀòn dờng Buôn Ma Thuột neh ngui kông nghệ kao tàm broă tam blơn sut plai chi Nova. Tơnơ̆ rlau 5 nam kơlôi sơnơng, tam tơrlòng lài, kông ty neh lơh sir broă rơndap lơh kỹ thuật, broă sơngka sền gàr mờ ơn phơng tờm chi in, tus tŭ do, blơn sut plai chi Nova neh gơtùi hòn dờng mờ gơs niam di mờ ù tiah, trồ tiah Tây Nguyên, ai cồng nha tơnhàu mờ bơta niam uă. Nàng gơtùi lơh geh cồng nha do, bal mờ bơta lơh ngan bơh kông ty dê gam geh bơta dong kờl uă ngan bơh ală cau bơcri priă tàm gah lơh sa suơn sre kông nghệ kao dê. Mò Nguyễn Thái Thanh, Kwang atbồ Kông ty Kổ phần Ban Mê Green Farm pà git: “Tàm tơngai lài, kông ty bol hi geh ală cau bơcri priă dờng bơcri priă nàng bơtàu tơnguh tai bè khoa họk kông nghệ ngui tam gơl sồ tàm lơh sa suơn sre bè khi ai bơceh lơh ală sră cih pah ngai tàm điện tử nàng lơh sir mờ tơnơ̆ do geh tơrgùm tàm anih Blocchange nàng gơtùi mut sền git tàm gùt dunia nàng cau blơi phan bol he dê git tus phan bơna bol he bè lơi mờ bơta niam bè lơi”.

Ala mat kông ty kổ phần Ban Mê Green Farm yal bè broă tam blơn sut plai chi Nova mờ Ƀí thư Tỉñ ủy Dăk Lăk

Là dùl tàm ală mpồl lơh sa kă bro mờng bè lơh gơlik, tac hờ lơgar ndai phan bơh suơn sre hữu kơ, ồng Phạm Hữu Thời, Kwang atbồ dờng kông ty TNHH lơh sa suơn sre Nhất Thống đơs là: Dăk Lăk là càr geh bơta pràn bè bơtàu tơnguh lơh sa suơn sre bal mờ ală phan bơna bơh suơn sre tac bro geh bơta kuơ uă bè: kơphe (20 rbô lồ), kau su (40 rbô lồ), tiêu (21 rbô lồ). Dăk Lăk geh uă bơta pràn, bơta ƀuơn bè trồ tiah, ù tiah mờ ală bơta geh is nàng lơh jat ală jơnau kờñ bè lơh sa suơn sre jat gùng dà hữu kơ tŭ geh bơta pơgồp bal ngui kông nghệ kao tàm broă lơh sa. Cơng tàng là nam 2022, mpồl phan bơna biap, kơnuh, plai chi, tiêu, ka kao, kơphe bơh trang trại lơh sa suơn sre hữu kơ Cư Bao, thị xã Buôn Hồ, càr Dăk Lăk dê neh geh dờp tơl khà hữu kơ USDA bơh câu Âu mờ dờp tơl khà hưũ kơ JAS bơh lơgar Nhờk dê. Bulah bè hơ̆, jat ồng Phạm Hữu Thời đơs, lơh sa suơn sre ngui kông nghệ kao tàm Dăk Lăk gam dềt mờ rah rài, ờ tơl ală cau bơcri priă geh tơl bơta pràn nàng dong kờl ai ală cồng nha khoa họk kông nghệ kao ngui tàm lơh sa suơn sre. Den tàng nàng lơh geh jơnau kờñ bơtàu tơnguh lơh sa suơn sre ngui kông nghệ kao mờ tơnguh ròt bơta kuơ lơh geh phan bơh suơn sre, càr pal sền gròi tus gơ hòi gơ jà bơcri priă, lơh gơlik bơta niam rlau tai ai mpồl lơh sa kă bro in: “Nàng gơtùi lơh geh tơl khà hữu kơ bơh broă sơn đờm bơcri priă tus phan bơna lơh gơs dut ndơl, tus tŭ tus tê cau ngui sa den sồr mpồl lơh sa kă bro pal lam lơh ring bal phan bơna hơ̆. Bulah bè hơ̆, nàng gơtùi lơh geh bơta do mờ geh cồng nha tàm broă lơh sa den kờñ pal geh bơta dong kờl, sền gròi uă ngan bơh càr dê nàng dong mpồl lơh sa kă bro geh bơta ƀuơn tàm broă lơh sa”.

Ƀí thư Tỉñ ủy Dăk Lăk ồng Nguyễn Đình Trung iat jơnau dan bơh mpồl lơh sa kă bro bơcri priă tàm gah lơh sa suơn sre  công nghệ cao

Jat ồng Nguyễn Đình Trung, Ủy viên Đảng dà lơgar, Ƀí thư Tỉñ ủy Dăk Lăk đơs, tàm gùng dà bơtàu tơnguh gah lơh sa suơn sre càr dê, bơdìh mờ rơndap tap sèng wơl gah lơh sa suơn sre jat gùng dà tơnguh bơta ƀuơn bơh tơl tiah dê, gơ jat bal mờ jơnau kờñ drà kă bro, gơ dờp mờ tam gơl trồ tiah, mut gơ rờm bal dunia. Ƀan Thường vụ Tỉñ ủy sồr gah lơh sa suơn sre pơn jat tai tam gơl pa mờ tơnguh cồng nha ală broă lam lơh sa; sền gròi bơtàu tơnguh lơh bal lơh sa jat ròt bơta kuơ lơh geh, lơh sa geh sră cơng tàng tơl khà, ngui kông nghệ kap, lơh sa suơn sre sàng goh, lơh sa suơn sre hữu kơ tàm broă lơh sa... Càr geh lơh gơlik tơl bơta niam pơn jờng gơ hòi gơ jà mpồl lơh sa kă bro bơcri priă tàm broă lơh sa suơn sre. Ồng Nguyễn Đình Trung đơs nền: “Càr gam lam lơh broă rơndap ù tiah, rơndap sap sèng ngui ù kung bè rơndap ù tiah ală tiah lơh sa suơn sre ờ mìng gàr bơta niam, di mờ bơta geh ngan tŭ cau bơcri priă tus mờ càr den geh dùl bơnàng jă nàng cau bơcri priă kơlôi sơnơng, sền sơ wì mờ lơh nền bơcri priă. Dơ̆ 2 là lơh bal đah ală mpồl. Do kung là kơnòl bơh càr dê, càr geh lam lơh lơh bal. Dơ̆ 3 là bơta rơndap sap sèng phan bơna gùng lòt, phan bơna bơtơt rbòng dà mờ ală phan bơna ndai drơng ai ală rơndap broă lơh sa suơn sre kông nghệ kao in”.

Nàng lơh gơlik bơta tam gơl tàm bơtàu tơnguh lơh sa suơn sre kông nghệ kao, tơngai bơh nam 2016 tus nam 2020, càr Dăk Lăk gam tơrgùm hòi jà bơcri priă tàm ală rơndap broă lơh kuơmàng, geh: tiah lơh sa suơn sre ngui kông nghệ kao xã Ea Kpam (kơnhoàl Cư M'gar); tiah lơh sa suơn sre ngui kông nghệ kao xã Ea Tu (ƀòn dờng Buôn Ma Thuột); tiah lơh sa suơn sre ngui kông nghệ kao xã Hòa Xuân (ƀòn dờng Buôn Ma Thuột); Lơh hìu măi lơh gơlik phan bơh suơn sre tàm tiah lơh sa mờ măi mok Hòa Phú, Tân An (ƀòn dờng Buôn Ma Thuột); tiah lơh sa mờ măi mok Phú Xuân (kơnhoàl Cư M’gar); Tiah lơh sa suơn sre ngui kông nghệ kao Krông Búk (kơnhoàl Krông Búk).

Cau mblàng K'Duẩn