Ală ngai nggùl nhai 4 trồ tơngai duh rơ ồl ngan, brê York Đôn duh bè hồl tơn, 8 nă cau gơ wèt Trạm kiểm lâm sồ 1, Hạt kiểm lâm Brê dà lơgar York Đôn, càr Dăk Lăk kung gam lơh ngan wàs, khòm nhơt ro, lam lơh broă “chu lài geh bơta gròi sền”. Ồng Nguyễn Hữu Tạo- Phó Kwang atbồ Hạt kiểm lâm Brê dà lơgar York Đôn yal, gam là tơngai prang duh ngan, jơnau pơhìn ồs sa tàm do neh gơguh tus kâp V, là kâp ngòt rơngơt ngan. Nàng rơcang sơndră ồs sa, Hạt kiểm lâm neh pơgồp bal mờ ală mpồl lơh broă ndai ai mờr 200 nă kwang bàng, cau lơh broă nàng lòt sền, sền gàr mờ rơcang sơndră ồs sa brê: “Jơh ală trạm, ală mpồl pal ơm gak ngai mang tàm ală tiah ƀuơn gơlik geh ồs sa, lam lơh broă lơh chu lài geh bơta gròi sền, nàng bơsong niam phan ồs sa tơl kơnă. Hơ̆ là bơsong pơn yơu tềng do he gŏ digơlan ồs sa den he chu lài nàng tơrmù ƀà phan ƀuơn ồs sa, mờ tus ngai tơnơ̆ den lòt chu tiah ndai tai, bè hơ̆ den geh dong là dilah gơlik geh ồs sa den kung ờ gơtùi gơ rề uă, lơh aniai tus chi brê. Dơ̆ 2 là lơh gơlik mƀùr nàng phan dềt hơ đơm mƀur brê in kis, nhơt in hòn nàng phan brê geh phan sa nàng kis”.

Bal mờ broă lơh rơcang sơndră ồs sa gam geh lam lơh làm uă tàm gùt càr, ală mpồl gơ wèt mpồl kiểm lâm mờ ală cau tờm brê kung sền gròi tus broă tơnguh pràn jak crùh ồs sa brê. Ồng Hồ Văn Lành, Phó kwang atbồ Hạt kiểm lâm Krông Năng- Buôn Hồ pà git, kơnờm geh bơta rơcang lài niam ngan bè cau lơh broă kung bè phan bơna, măi mok mờ ală broă rơndap lơh rơcang sơndră ồs sa tàm ƀòn lơgar tơn, dơ̆ ồs sa tàm Tiểu khu 299 gơ wèt xã Cư Klông, kơnhoàl Krông Năng gơlik geh tàm bồ nhai 4 do neh geh crùh chơt: “Tơnơ̆ tŭ klo yal geh ồs sa brê, bol hi neh pơgồp bal mờ Mpồl kiểm lâm làm bă tiah sền gàr brê mờ rơcang sơndră ồs sa brê sồ 3, gơ wèt Ci kụk kiểm lâm Dăk Lăk, cau tờm bê mờ gơnoar atbồ tàm ƀòn lơgar, lam lơh hòi jà mpồl cau gơguh tus rlau 40 nă lam lơh crùh ồs sa. Jơh ală ndrờm lơh jat kơrnuat 4 tơn tàm dùl anih nàng crùh ồs sa, mờ bơta lơh ngan bơh oh mi dê den bă ồs sa neh geh crùh chơt di tŭ, ờ lời gơlik geh jơnau gơ lời wơl kơn jơ̆”.

Jat ồng Nguyễn Quốc Hưng- Kwang atbồ Ci kụk Kiểm lâm càr Dăk Lăk pà git, tŭ do, mờr nggùl bă brê tàm càr, ndrờm mờr 237 rbô lồ gam ơm tàm jơnau pơhìn gơlik geh ồs sa bơh uă tus uă ngan. Tàm hơ̆ 189 rbô lồ digơlan gơbàn ồs sa uă mờ rlau 48 rbô lồ tàm kâp đơs lài gơbàn ồs sa kâp ngòt rơngơt ngan. Den tàng, mpồl kiểm lâm, ală cau tờm brê halà Ủy ƀan Ñân zân ală xã gam tơrgùm tàm kơnòl broă rơcang sơndră ồs sa brê. Ồng Nguyễn Quốc Hưng đơs nền: “Bơh tơnơ̆ sa tềp bơhiàn yau tus tŭ do, bol hi neh rơcang lài bơt bơtàu ală broă rơndap lơh, tơnơ̆ hơ̆ lam lơh dơ̆ lĕ bal tus ală Hạt kiểm lâm kơnhoàl, 3 mpồl kiểm lâm làm bă tiah nàng pơgồp bal mờ ală tiah lam lơh broă lơh rơcang sơndră ồs sa brê. Kuơmàng, tàm tơngai prang duh bồ nhai 4 do, Ci kụk Kiểm lâm càr kung neh crơng gơs Mpồl sền sơ wì làm gah rơcang lài lòt sền, sồr lơh ală cau tờm brê tàm ală kơnhoàl bè: Ea Súp, Ea Kar, M’Drăk, Cư Mgar, Buôn Đôn, Krông Bông, Lăk.. pal gàr niam broă lơh rơcang sơndră crùh ồs sa brê. Bol hi kung sền sơ wì broă lơh rơcang lài ală phan bơna, cau lơh broă, priă jền bơh ală cau tờm brê dê nàng kờñ rơcang lài broă rơndap lơh, lơh bè lơi tŭ geh ồs sa den pal geh broă rơndap lơh crùh ồs sa di tŭ ngan rlau jơh”.