VOV4.K’ho- Mìng gam ờ hềt tus nggùl nhai tai là tus sa tềp bơhiàn Ñâm Zần 2022, do là tŭ tơngai mờ làng bol Dăk Lăk tơrgùm lòt blơi phan bơna nàng rơcang wă rò sa tềp. Broă tơrgùm gal cau tàm tơngai kòp Kovid-19 yàm càr kung gam gơlik geh kal ke tŭ pah ngai git gŏ mờr 200 nă cau kòp, pơhìn gơlik geh bơta aniai mờ jơnau pơhìn bơtờp uă kòp. Nàng kơryan jơnau pơhìn do, gơnoar atbồ càr mờ ală mpồl lơh broă gam rơcang lài tơnguh ală broă lơh rơcang sơndră kòp Kovid-19.

Tàm 2, 3 drà drơng rài kis làng bol in tàm ƀòn dờng Buôn Ma Thuột, broă lơh rơcang sơndră kòp bơtờp kung gam geh gàr sùm nền nòn ngan. Pơn yơu bè tàm Kông ty kổ phần kă bro drà Buôn Ma Thuột, khà làng bol mut tàm drà gal rlau mờ ngai bè ờs, mơya broă lơh rơcang sơndră kòp kung gam geh sền gròi. Tŭ do, drà Buôn Ma Thuột geh pơgap rlau 8 rbô nă cau tac phan. Jơh ală cau tac phan bơh drà dê ndrờm geh cit tơl 2 ding sơnơm vaccine kòp Kovid-19. Tàm ală mpồng mut, lik tàm drà, mpồl atbồ drà ndrờm rơndap anih ơn dà ràu tê lơh kloh khuẩn mờ kơ ƀàng yal bè pràn kơldăng să jan ai gah lơh sơnơm in mờ broă quét mã QR gơ wèt mờ ală cau ngui điện thoại ngac ngar mờ cih wơl bè pràn kơldăng să jan mờ sră gơ wèt tus mờ ală cau ờ ngui điện thoại ngac ngar. Bè broă lơh mblàng yal, drà Buôn Ma Thuột lir, crap ală pano, áp phích bè broă rơcang sơndră kòp tàm ală anih geh gal cau lòt rê; sùm pờ tơlik jơnau đơs yal bè ală sră nggal pa, ală tam gơl bè jơnau sồr rơcang sơndră kòp bơtờp...

Cau lơh broă siêu thị was duh să jan tŭ làng bol lòt blơi phan

Ồng Nguyễn Duy Quảng, kwang atbồ Mpồl atbồ drà Buôn Ma Thuột pà git: “Rơcang wă rò sa tềp mờr tus den khà cau lòt blơi phan geh uă rlau, rlau mờ hơ̆ tai den phan bơna bơh cau tac bro dê kung uă rlau sơl. Tàm dơ̆ sa tềp do, bol hi sùm pal pờ tơlik jơnau đơs yal cau lòt drà in kung bè cau tac bro in neh mut tàm drà den pal pơn chèu glòm muh mat, gàr bơta ơm yah ngài mờ gàr niam broă rơcang sơndră kòp bơtờp dùl bă niam ngan rlau”.

Ai tàm ală siêu thị, hìu ràng tac phan tàm ƀòn dờng, bơh mpồng mut mờ lik tơn, cau lơh broă bơh ală hìu tac phan, siêu thị dê ndrờm gàr sùm jơnau sồr jơh tơl nă cau lòt blơi phan pal ràu tê mờ dà lơh khuẩn, yal bè pràn kơldăng să jan tơl làm mờ sồr làng bol ơm yah ngài tŭ mut blơi phan bơna. Bal mờ hơ̆, ală siêu thị kung sồr jơh tơl nă làng bol, cau tac phan pal pơn chèu glòm muh mat mờ ràu tê lơh kloh khuẩn tàm tŭ ơm rềp, bơh bơr tac bro phan bơna.

Ală pano, áp phích geh ơn tàm ală mpồng lik, mut bơh drà Buôn Ma Thuột dê

Jat ồng Bùi Văn Quân, Kwang atbồ Anih tờm siêu thị Go Buôn Ma Thuột đơs, bơdìh mờ broă rơcang tơl làm măi was is duh să jan, dà lơh kloh khuẩn mờ tiah yal bè pràn kơldăng să jan ai cau lòt blơi phan in bơh bơdìh mpồng mut tàm siêu thị tơn, siêu thị sùm rơcang lài test mhar kòp Kovid-19 pah poh ai jơh ală cau cau lơh broă in. Bal mờ hơ̆, pah ngai, tơnơ̆ tŭ jơ til mpồng, siêu thị geh lơh kloh khuẩn jơh gùt siêu thị mờ dà sơnơm Cloramin B nàng rơcang sơndră kòp Kovid-19: “Jơh ală cau lơh broă tàm siêu thị tŭ mut lơh broă pal pơn chèu glòm muh mat, ală anih ơm rềp tơn mờ cau lòt blơi phan den pal geh krơh sơndră dà mprañ, mìng is mờ cau kờp priă den siêu thị sồr pal dò sơ prồm tê nàng tơrmù ƀà broă tàm tup mờ priă digơlan lơh bơtờp kòp. Gơ wèt mờ cau lòt blơi phan den jơh ală cau lòt blơi phan ndrờm pal yal bè pràn kơldăng să jan. Bơdìh hơ̆ tai, bol hi kung rơcang lài măi was is duh să jan mờ geh bal mờ ƀồm sơnơm lơh kloh khuẩn ai cau lòt blơi phan in”.

Đơs bè broă ală drà, siêu thị lam lơh ală broă lơh rơcang sơndră kòp Kovid-19 tàm mpồl he dê, mò Phạm Thị Tuyết Nhung, drơng broă Cơldŭ mờng chài lơh sơnơm, Sở Y tế càr Dăk Lăk, cau tàm mpồl sền sơ wì lam gah pà git: “Sền bal, jơh ală mpồl tàm tŭ lam lơh den 2, 3 mpồl ờ hềt git ală sră nggal, 2, 3 mpồl git mơya kung gam sền ờ sơp tàm broă lam lơh, uă drà bơh sơn rờp khà làng bol lòt blơi phan gal ngan mờ khi kung ờ hềt lơh jat jơnau sồr 5K mờ uă drà tŭ lam lơh den ờ hềt ngan ngồn, mìng lơh nàng kờñ dră wơl anih lơh broă geh gơnoar. Bơh dơ̆ lòt sền do, bol hi neh bơto pơlam tơn, pơlam mùl màl mờ kờp sền jơh ală anih gam ờ hềt lơh niam den pal bơsong mơ mờ tơnơ̆ tơngai 10 ngai den mpồl geh pơn jat tai sền sơ wì wơl mờ sền wơl jat cồng nha mờ mpồl neh lòt sền”.

Làng bol gam quét mã QR yal bè pràn kơldăng să jan lài mờ tŭ mut tàm siêu thị

Tàm tŭ tơngai kòp Kovid-19 kung gam gơlik geh kal ke, ală anih tac phan bè drà, siêu thị là dùl tàm ală anih pơhìn bơtờp kòp uă ngan. Den tàng, bơdìh mờ broă ală mpồl pal rơcang lài lơh jat nền nòn ală jơnau sồr rơcang sơndră kòp, kung kờñ geh bơta lơh bal bơh cau ngii sa dê nàng kờñ tơrmù ƀà bơta bơtờp uă bơh kòp dê, ngan là tàm tơngai sa tềp bơhiàn gam mờr tus.

Cau mblàng K’Duẩn