Mpồl so hìu bi Y Bruat Niê ơm tàm ƀòn Ea Phê, xã Ea Phê, kơnhoàl Krông Pách neh ròng rlau 3 nam mơya ờ hềt dùl dơ̆ cit sơnơm vaccine rơcang sơndră kòp sơnrang. Bi pà git, jơnau là tài bơh so ting lềng neh jŏ, bi rơngòt gơ kap tŭ kup so: “Neh jŏ ngan ờ git cit sơnơm vaccine, 2 nơm so me jàñ ngan ờ khin kup, dilah he kup den gơ kap, rơngòt so kap den tàng ờ gơtùi lam lòt cit. Tài dilah so kap den ngòt rơngơt, dilah ờ thàn lòt hìu sơnơm là chơt tơn”.

Klo yal tàm loa pờ tơlik jơnau đơs xã dê bè tơngai cit sơnơm vaccine rơcang sơndră kòp sơnrang so mèo in, hìu bơnhă bi Ngô Quốc Đạt, ơm tàm xã Ea Kuăng, kơnhoàl Krông Pách, càr Dăk Lăk neh lời tŭ jơ nàng ơm tàm hìu kơp kwang bàng lơh sơnơm phan ròng tus cit sơnơm vaccine rơcang sơndră kòp sơnrang ai 3 nơm so hìu bơnhă dê in. Bi pà git, tàm do ndrờm bè hìu lơi kung ròng êt ngan là 1, nơm so, mèo, mơya ờ cau git lam phan ròng lòt cit sơnơm vaccine rơcang sơndră kòp sơnrang, mờ sùm kơp geh dơ̆ cit jat broă lơh dà lơgar: “Kòp sơnrang den kung git là ngòt rơngơt, bè cit sơnơm vaccine rơcang sơndră kòp sơnrang den niam ngan, dilah geh broă lơh lòt cit tàm hìu den añ kung kờñ cit so in. Dilah geh sơnơm cit den kung niam ngan, he rơcang sơndră kòp gơ in, dilah gơtìp so kap kung ờ huan ngòt rơngơt”.

Kơnhoàl Krông Pach geh rlau 10 rbô hìu bơnhă ròng so mờ kờp jơh rlau 15 rbô nơm. Bulah bè hơ̆, nam 2022 gah lơh sơnơm phan ròng mìng lam lơh cit sơnơm vaccine ai geh 3 rbô 800 nơm so in. Jat ồng Võ Văn Vàng- Anih ròng phan mờ lơh sơnơm phan ròng kơnhoàl Krông Pách đơs, bơta kal ke ngan rlau jơh là ờ geh bơta lơh bal bơh cau ròng so dê: “Kuơmàng ngan rlau jơh tŭ do là jơnau git wă bơh cau ròng phan dê. Mùl màl den jơnau git wă cau ròng phan dê niam den broă lơh cit sơnơm vaccine rơcang sơndră kòp sơnrang niam ngan. Bulah bè hơ̆, tŭ do làng bol kung gam ờ gròi sền tus broă lơh rơcang sơndră kòp sơnrang. Uă tŭ làng bol geh ală broă lơh ờ huan niam gơ wèt mờ cau lòt cit sơnơm vaccine, pơn yơu là tŭ mpồl lơh sơnơm phan ròng tàm ƀòn lơgar den làng bol đơs là so den ya, gơtùi kup den cit”.

Jat tơrgùm kờp bơh Sở Nông nghiệp mờ Phát triển Nông thôn dê, bơh nam 2018 tus nam 2022, càr Dăk Lăk neh git gŏ 25 nă cau chơt tài bơh kòp sơnrang. Tàm hơ̆, geh ală cau gơ drơm kòp jŏ ngan, gơtìp so kap bơh 4 nhai tus 1 nam tơnơ̆ hơ̆ sồng gơ bàn kòp. Jơh ală cau chơt ndrờm ờ lòt cit sơnơm vaccine tơnơ̆ tŭ gơtìp so mèo kap, khuah.

Bulah pah nam ndrờm git gŏ ală cau chơt tài bơh kòp sơnrang, mơya broă lơh cit sơnơm vaccine rơcang sơndră kòp sơnrang ai phan ròng in tàm Dăk Lăk mìng geh rlau 30% tàm khà 360 rbô nơm so, mèo. Tŭ do, Dăk Lăk gam lam lơh broă lơh cit sơnơm vaccine rơcang sơndră kòp sơnrang ai so, mèo tàm gùt càr in bơh ngai 25/3 tus ngai 25/4. Jat hơ̆, ală hìu bơnhă cau jơi bơtiàn kòn cau dùl êt nă cau, hìu bơnhă rƀah rơp ờ geh sa priă cit sơnơm vaccine ai so mèo in. Ală cau ndai priă cit là 22 rbô 100 đông dùl ding.