Do là dơ̆ pơrjum ờs mờng gùl nam nàng sền swì, đơs broă lơh jăt kơrnoăt bơh Hội đồng Ñân zân càr dê bè kơnòl broă bơtàu tơnguh lơh sa- mpồl bơtiàn 06 nhai bồ nam mờ sồr lơh kơnòl broă, broă lơh lơh jăt 6 nhai lồi nam. Yal tàm dơ̆ pơrjum, tàm 6 nhai bồ nam do, lơh sa- mpồl bơtiàn càr Dăk Lăk dê kơ̆ kơl jăp đau. Kờp jơh priă phan bơna lơh geh tàm ù tiah càr dê kờp dŭ geh mờr 24 rbô 500 tơmàn đong, gơguh 4% pơndrờm bal dùl tŭ mờ nam 2022.

Kờp jơh priă geh bơh tăc phan mờ lơgar ndai kờp dŭ geh 810 tơlak dolar Mỹ, gơguh 2% pơndrờm bal dùl tŭ mờ nam lài. Bulah bè hơ̆, kờp jơh tă dia tàm pơnring kes priă dà lơgar gơmù 16,6% pơndrờm bal dùl tŭ mờ nam lài, ală broă lơh gơhòi gơ jà bơcri priă, bơtàu tơnguh wơl lơh sa kă bro, bơsong broă lơh, tơrmù rƀah kơ̆ kơl jăp tìp uă kal ke, ală broă lơh jơnau kờñ dà lơgar lam lơh lơyài...

Dơ̆ pơrjum do, bal mờ cribơyai, sồr lơh ală broă lơh bơtàu tơnguh lơh sa- mpồl bơtiàn 6 nhai lồi nam, Hội đồng Ñân zân càr Dăk Lăk rơ̆p cribơyai, ai jơnau đơs uă broă lơh, rơndăp broă lơh kwơmàng càr dê; mblàng sền ală kal ke, bơta gơkòl, bơta kơryan pal tă bơsong, lơh loh ală jơnau bơh tài gơbàn bơta do nàng lơh jăt kơnòl broă 6 nhai lồi nam.