VOV4.K’ho - Gơrềng tus mờ dơ̆ mus kơl chi brê Pơmu tàm tiah brê 1219 gơwèt bơnah bă brê atbồ bơh Kông ty TNHH MTV Lâm nghiệp Krông Bông mờ VOV neh yal, dùl nă kwang đơng lam Sở Nông nghiệp mờ Phát triển Nông thôn càr Dăk Lăk pà git, sở do neh yal broă do tus mờ UɃÑZ càr mờ gam kơ̆p geh jơnau bơsong broă do.

                                                Gơl dơm chi mờ cau kơñao kơl lời wơl

Jăt Sở do yal, tàm tơngai pa do, Kông ty TNHH MTV Lâm nghiệp Krông Bông geh jào atbồ sền gàr brê mơya ờ rơcang lài, ờ lơh jăt nền nòn, ờ geh cồng nha tàm broă bơyai lơh lòt sền gròi, kơrian ală broă lơh sơgràm tus mờ brê, mus kơl chi brê tàm tơngai jŏ. Den tàng, Sở Nông nghiệp mờ Phát triển Nông thôn càr sồr Kông ty TNHH MTV Lâm nghiệp Krông Bông bơyai lơh sền wơl, lơh loh kơnòl bơh cau lam bồ, ală cau dùl nă să, mpồl cau lơh broă gơrềng bal. Cồng nha sền wơl broă lơh pal geh lơh jăt mờ pơyoa tus UɃÑZ càr Dăk Lăk lài mờ ngai 04 nhai 3 tus.

Cau mblàng Ndong Brawl