VOV4.K’ho- Mho ngai 29/07, Hội đồng Ñân zân càr Dăk Lăk bơyai lơh dơ̆ pơrjum tơngume dơ̆ puan nàng sền swì, ring bal tam gơl Kơrnoăt bè gùng dà bơcri priă lơh rơndăp broă Lơh niam wơl mờ lơh kơ̆ kơl jăp ală tơnau dơng dà.

Kơrnoăt sồ 11 nam 2022 bơh Hội đồng Ñân zân càr Dăk Lăk dê geh ring bal tàm nhai 06 nam 2022 geh 8 rơndăp broă lơh bơnah, mờ kờp jơh priă bơcri lơh 134 tơmàn đong ai bơh kes priă dà lơgar dê. Gùl nhai 7 pa do, Ƀộ Kế hoạc mờ Đầu tư geh sră đơs là, broă kĭ 8 rơndăp broă lơh tàm Kơrnoăt sồ 11 bơh càr Dăk Lăk dê là ờ hềt dipal mờ sră cih mat mờ khà priă ai ală kơnòl broă, rơndăp broă lơh gơwèt broă lơh bơtàu tơnguh wơl mờ bơtàu tơnguh lơh sa- mpồl bơtiàn, kờñ pal geh bơta tam gơl gơ in dipal.

Den tàng bè hơ̆, tàm dơ̆ pơrjum tơngume do, Hội đồng Ñân zân càr Dăk Lăk neh tam gơl kờp jơh priă bơcri lơh 8 rơndăp broă lơh là 134 tơmàn đong, tàm hơ̆ 123 tơmàn đong ai bơh kes priă dà lơgar mờ rlau 11 tơmàn đong ai bơh kes priă càr dê.

Cau mblàng Lơ Mu K’Yến