VOV4.K’ho- Drim ngai 24/08, tàm ƀòn dờng Buôn Ma Thuột, Mpồl lơh bơyô bal Việt Nam mờ Lào càr Dăk Lăk bơyai lơh tìp mat kwang bàng cau ling geh griăt lài do, cau jak chài lài do neh lơh broă tàm lơgar Lào di dơ̆ tơngkah kir sơnrai  60 nam lơh bơta gĭt gơ̆p lơh broă bal mờ lơgar ndai (5/9/1962-5/9/2022) mờ 45 nam ngai kĭ Hiệp ước lơh bơyô bal, lơh broă bal Việt Nam – Lào, Lào- Việt Nam.

Anih tàm dơ̆ tìp mat

Tàm dơ̆ tìp mat, ală kwang bàng neh iăt jơh jơnau đơs bơh Tổng Bí Thư ồng Nguyễn Phú Trọng dê tàm dơ̆ tơngkah kir sơnrai 60 nam ngai lơh bơta gĭt gơ̆p lơh broă bal mờ lơgar ndai Việt Nam- Lào. Tìp mat lơh kuèng, tam pà bal jơnau kir tàm tơngai tus bal broă lơh, tam lơh tàm ù tiah lơgar Lào dê, tơngŏ nùs nhơm, bơta kơ̆p kờñ mờ jơnau đơs, jơnau dan ală tơngume geh gơrềng tus broă lơh bơh Mpồl lơh bơyô bal dê kung bè lơh broă, broă lơh bơh cau tàm mpồl mờ cau ling geh griăt lài do, cau jak chài lài do neh lơh broă, tam lơh tàm lơgar Lào. Di dơ̆ do, Ủy ƀan Ñân zân càr Dăk Lăk pà 100 bơnah phan ai ală cau ling geh griăt lài do, cau jak chài lài do neh lơh broă tàm lơgar Lào geh rài kis kal ke, ơm is dùl nă să.

Cau mblàng K’Hạnh