VOV4.K’ho- Drim ngai 09/02, Tỉñ ủy, Hội đồng Ñân zân, Ủy ƀan Ñân zân, Ủy ƀan Mặt trận dà lơgar Việt Nam càr Dăk Lăk bơyai lơh tìp mat cau lơh ƀău, văn nghệ sĩ, cau geh bồ tơngoh bơsram sră bồ nam pa Ñâm Zần 2022. Tàm dơ̆ tìp mat, 150 nă cau ala mat geh pơn rơ jak, ala mat ai mpồl cau lơh ƀău, văn nghệ sĩ, cau geh bồ tơngoh bơsram sră bơh càr dê in neh bal mờ gơp sền wơl cồng nha lơh broă, bơta tă pơgồp bơh ală gah, ală broă lơh dê tàm nam pa do, ai tơlik 2, 3 tơngume tàm broă lơh khoa họk kông nghệ, sră ƀău, văn nghệ ală nam pơn jat tai.

Lòt gan dùl nam kong uă bơta gơ rềng bơh kòp Kovid-19 dê, mpồl văn nghệ sĩ neh bơyai lơh uă broă lơh ngan ngồn, pơgồp bơnah uă ngan ai niam chài càr Dăk Lăk dê in pơn jat tai bơtàu tơnguh mờ geh bơta niam. Mpồl ală cau lơh ƀău neh yal tơnggit ngai sơlơ niam ală broă lơh bơh rài kis, mpồl bơtiàn dê pơgồp bơnah tàm cồng nha bal tàm bơtàu tơnguh lơh sa mpồl bơtiàn bơh càr Dăk Lăk dê. Mut tus nam 2022, kwang đơng lam bồ càr Dăk Lăk kơp kờñ mpồl cau lơh ƀău, văn nghệ sĩ, cau geh bồ tơngoh bơsram sră mờ bồ tơngoh jak chài, bơta git wă he dê geh lơh ngan tă pơgồp ai càr in uă rlau tai.

Cau mblàng K’Duẩn