VOV4.K’ho - Bơh bồ nam tus tŭ do, ală mpồl lơh broă gah lơh ồs đèng tàm càr Dăk Lăk neh gŏ rơlao 1 rơbô dơ̆ tìs mờ broă ngui ồs đèng. Tàm hơ̆ mìng is broă kơñao ồs đèng geh gŏ 58 dơ̆, toh wơl khà priă geh rơlao 900 tơlăk đong.

    Cau lơh broă gah ồs đèng tus sền gùng che ồs đèng gơtìp gơtŭp tàm ƀòn 4, xã Ea Nam, kơnhoàl Ea H'leo

Mờ ală mpồl lơh broă kung tơnguh broă ngui ală broă lơh, phần mềm mblàng khà geh bơh ngài, rơcang sền gròi broă tam gơl khà geh ngui, gŏ ală bơta tơngŏ ni sơna tàm broă ngui ồs đèng bơh cau ngui dê. Broă lơh do gam pơgồp bal tàm broă tơmù uă ngan broă di gơlan gơtìp ală rềs àr bơh ồs đèng tàm rài kis làng bol dê. Nam do, gùt càr neh gŏ 54 dơ̆ khà ồs đèng gơguh ni sơna tài gơtŭp gùng che ồs đèng tơnơ̆ mờ kông tơ was ồs đèng, di tŭ dong kờl cau ngui tơmù bơta ờ niam mờ gàr niam ờ do ờ dă ồs đèng.

Cau mblàng Ndong Brawl