VOV4.K’ho - Pal tơn jơh broă lơyài tàm broă rơndăp ù tiah, broă rơndăp lơh ngui ù, do là jơnau sồr bơh Mpồl kwang bàng jăt sền HĐÑZ càr Dăk Lăk dê tàm dơ̆ lơh broă mờ UɃÑZ càr bè broă lơh jăt broă lơh adăt boh lam ù tiah tơngai bơh nam 2016 tus 2021 geh bơyai lơh tàm ngai 04 nhai 10.

Jăt jơnau yal tàm dơ̆ lơh broă, tơngai bơh nam 2016 tus 2021, UɃÑZ càr Dăk Lăk neh kĭ broă rơndăp lơh ngui ù tơngai bơh nam 2021 tus 2030 bơh 13 tàm 15 tiah. Tŭ do gam 2 tiah ờ hềt geh kĭ broă rơndăp ù tiah là ƀòn dờng Buôn Ma Thuột mờ kơnhoàl Ea Súp. Bè broă rơndăp ngui ù pah nam bơh ală kơnhoàl, thị xã, ƀòn dờng dê tus tŭ do UɃÑZ càr mìng rơ̆p kĭ broă rơndăp lơh ngui ù tus nam 2022 ai 6 tàm 15 tiah in, gam 9 tiah ờ hềt geh càr kĭ. Đơs tàm dơ̆ jăt sền, ồng Trần Phú Hùng, Phó Củ tịc HĐÑZ càr Dăk Lăk sồr UɃÑZ càr đơng lam ală anih lơh broă gơrềng bal tơnguh broă lam sồr adăt boh lam bè broă rơndăp lơh ù tiah, broă rơndăp lơh ngui ù; tơn jơh broă lơyài mờ tơnguh uă bơta niam broă bơ̆t bơtàu broă rơndăp lơh ù tiah; di tŭ kĭ broă rơndăp lơh ngui ù kấp kơnhoàl... Tàm hơ̆ sền gròi rơlao tai tus mờ broă chồl mhar tơngai lơh broă, lơh gơs broă rơndăp lơh ngui ù tàm ƀòn dờng Buôn Ma Thuột.

VOV Tây Nguyên-Cau mblàng Ndong Brawl