VOV4.K’ho- Mho ngai 15/06, Tỉñ ủy Dăk Lăk bơyai lơh pơrjum tơn jơh lơh jat Nghị quyết sồ 10 nam 2002 bơh Ƀộ Cíñ trị dê bè bơtàu tơnguh lơh sa- mpồl bơtiàn, sền gàr niam sền gàr dà lơgar- sền gàr bơta lơngap lơngai tiah Tây Nguyên tơngai bơh nam 2001-2010 mờ jơnau đơs pơn dŭt sồ 12 nam 2011 bơh Ƀộ Cíñ trị khoá 11 bè pơn jat tai lơh jat Nghị quyết sồ 10 nam 2022 bơh Ƀộ Cíñ trị khoá 9 bơtàu tơnguh tiah Tây Nguyên tơngai bơh nam 2011-2020.

Dăk Lăk: Tơn jơh lơh jat Nghị quyết sồ 10 mờ Jơnau đơs pơn dŭt sồ 12 bơh Ƀộ Cíñ trị dê bè bơtàu tơnguh tiah Tây Nguyên

Jat jơnau yal tàm pơrjum, tơngai bơh nam 2001-2020, lơh sa bơh càr Dăk Lăk dê gơguh kờp bal lơh geh mờr 14%; rài lơh sa gơguh mờr 11 dơ̆, bơh rlau 5 rơbô 600 tơmàn đong nam 2002 gơguh 61 rơbô 800 tơmàn đong tàm nam 2020. Priă lơh geh kờp bal tơl nă cau tàm càr geh gơguh niam, nam 2020 lơh geh mờr 54 tơlak đong dùl nă cau dùl nam, gơguh uă rlau 18 dơ̆ pơndrờm mờ nam 2002. Khà hìu bơnhă rƀah jat tơl khà rƀah tơngai bơh nam 2016-2020 gam 6,3% tàm lồi nam 2021. Rài kis nùs nhơm bơh làng bol dê ngai sơlơ geh tam gơl mờ tơnguh uă. Đơs pơn dŭt pơrjum, Tỉñ ủy Dăk Lăk sồr ală kấp ủy Đảng, gơnoar atbồ pơn jat tai tơnguh uă nùs nhơm geh kơnòl, ƀồ tơngoh tă pơgồp jơnau đơs, jơnau dan, đơs lơh sir jơnau dan mờ Dà lơgar nàng geh bơnàng jă ai ngui Nghị quyết pa, lơh geh tơngai niam, bơta gơn kơnờm ai bơta bơtàu tơnguh tiah Tây Nguyên in tàm tơngai tus.

Cau mblàng K’Hạnh