VOV4.K’ho - Tơnơ̆ mờ tơngai jŏ gơtìp gơrềng tài bơh kòp Kovid-19, broă nhơl chờ càr Dăk Lăk gam geh ală bơta tơngŏ brồ guh niam. Bal mờ broă tơnguh uă bơta niam ală phan tŭ do geh, càr gam lơh ngan lơh pa mờ uă bơta phan nàng hòi jà cau năc.

Tus bal mờ ală jơnau đơs crih chờ niam tàm dơ̆ teh phan đơs crih tamya ờs mờng Tây Nguyên tàm Ƀảo tàng càr Dăk Lăk, ồng Nguyễn Văn Sơn, cau năc nhơl chờ tus bơh ƀòn dờng Hà Nội gơlơh chờ hờp mờ gơboh gơbài ngan.

              Nhơl chờ sinh thái, bơta chài rơgơi tàm càr Dăk Lăk geh uă cau năc sền gròi, tus nhơl sền

Ồng Sơn pà git, ồng neh iăt mờ git tus càr Dăk Lăk bơh tàm amih yal tơngit, mơya do là dơ̆ sơnrờp ồng geh tus tàm do nhơl sền. Ală broă lơh tàm broă tus nhơl mờ sền jăt dơ̆ nhơl chờ dê niam mờ hòi jà ồng uă ngan. “Niam ngan. Cau kis bơh đah tô dà lơgar tus tàm do mờ gŏ tiah Tây Nguyên bè do den niam ngan, rơ̆p tus geh iăt ală jơnau đơs crih Tây Nguyên dê den chờ ngan mờ ù tiah kung niam sơl, tŭ do hơ̆ sồng rơ̆p tus sền nhơl. Broă lòt sền nhơl mờ geh tìp bè do den mùl màl là niam ngan. Si sơna nùs nhơm gơlơh chờ mờ ngoh rơngăc ngan tŭ geh tìp ală cau Tây Nguyên mùl màl là chờ hờp ngan, mờ gơlơh pơnyờ să ngan geh dùl jơi bơtiàn kòn cau tai, he git tai dùl bă ù tiah”.

Ală ngai di, pah ngai Ƀảo tàng càr Dăk Lăk wă git nđờ rơhiang nă cau năc tus, geh ală ngai, khà cau năc nhơl chờ tus git nđờ rơbô nă. Ồng Đinh Một, Kwang atbồ Ƀảo tàng càr Dăk Lăk pà git, do là bơta tơngŏ chờ hờp ngan tài tơnơ̆ mờ tơngai jŏ ờ geh năc tus tài gơrềng bơh kòp Kovid-19, tŭ broă nhơl chờ geh pờ wơl, den gah nhơl chờ càr Dăk Lăk neh geh ală broă brồ guh wơl. Khà cau năc tus nhơl sền ală ngai do kung neh ai gŏ ală broă lơh ngan bơh gah do dê tàm broă lơh broă bal mờ cau năc nhơl chờ bơh uă gah yal tơngit. “Tàm broă kòp gơtờp den bol añ sùm lơh broă bal mờ cau năc tàm internet. Bol añ bơyai lơh uă broă lơh tàm hơ̆, bè yal ală broă ràng tơlik tàm internet, bol añ yal ală jơnau, phan tàm hơ̆ mờ sùm lơh broă bal mờ cau năc tàm Fanpage mờ Youtube bơh Bảo tàng dê. Kơnờm mờ hơ̆, den tàng bơh Ƀảo tàng càr Dăk Lăk mờ cau năc nhơl chờ ndrờm geh broă lơh bal niam mờ tŭ geh gùng dà broă lơh pờ mpồng ngơl chờ den cau năc geh tus. Bol añ dờp geh uă ngan cau cih măt dan, khà cau năc tus gal ngan”.

                    Tàm quý 1 nam do, khà cau năc nhơl chờ tus tàm càr Dăk Lăk geh tơngŏ gơguh

Bal mờ broă chồl pràn mờ tơnguh bơtàu ală phan nhơl chờ, bơh bồ nam tus tŭ do, càr Dăk Lăk kung neh lơh ngan yal, hòi jà nhơl chờ mờ ală càr nàng tơrbŏ bal ù tiah nhơl chờ mờ tơnguh bơtàu ală broă lơh nhơl chờ jăt gơl gùng lòt. Tàm quý 1 nam do, càr neh tus bal lơh chờ ràng tơlik nhơl chờ dunia, lơh broă bal mờ ală càr Phú Yên, Bình Định, Quảng Ngãi, Gia Lai, Kon Tum, ha là chồl pràn broă tơrbŏ bal lơh phan nhơl chờ mờ càr Khánh Hoà. Mò Nguyễn Thị Lệ Thanh, Kwang atbồ Sở Zu lịc càr Khánh Hoà đơs niam bè broă geh tơrbŏ bal tiah nhơl chờ đah bàr càr tàm broă tơnguh bơtàu nhơl chờ. “Bơta pràn bơh bàr càr dê den phan nhơl chờ bơh bàr tiah krơi is ngan, ờ ndrờm bal, den lơh geh tus broă bol añ lơh jăt broă pơgồp bal là ƀuơn ngan. Mờ bơta pràn bơh càr Khánh Hoà dê là nhơl chờ dà lềng, bồt dà lềng pơgồp bal mờ nhơl chờ sinh thái brê bơnơm bơh càr Dăk Lăk dê den lơh geh uă bơta phan mờ bơh broă lơh jăt broă tơrbŏ bal tiah den bol añ kơ̆p kờñ mờ phan nhơl chờ do den broă tơrbŏ bal geh cồng nha tàm tơngai pơn jăt tai”.

Jăt jơnau kờp bơh càr dê, tàm quý 1 nam do, càr Dăk Lăk neh wă geh mờr 240 rơbô nă cau năc nhơl chờ tus nhơl sền, nhơl chờ tàm càr do. Mìng is tàm nhai 4 pa do, khà cau năc tus tàm càr do sơlơ gơguh, tàm hơ̆ uă ngan là tàm ngai ơm rơlô, uă hìu cau năc ơm ndrờm neh tơl jơh. Ală mpồl cau năc tus bơh ală càr, ƀòn dờng bè ƀòn dờng Hồ Chí Minh, Hà Nội, Quảng Ninh,... kung rơwah càr Dăk Lăk là tiah tus nhơl chờ tàm tiah tàm gùl lơgar mờ Tây Nguyên. Jăt ồng Đặng Gia Duẩn, Phó kwang atbồ Sở Văn hoá-Thể thao mờ Zu lịc càr Dăk Lăk yal, mờ bơta pràn mờ bơta ƀuơn bè ù tiah geh is bal mờ bơta niam chài rơgơi, càr Dăk Lăk gam lơh ngan uă rơlao tai nàng rơhời brồ guh wơl broă nhơl chờ. “Dùl tàm ală broă lơh, jơh ală cau năc nhơl chờ tus bơh ală tiah tàm gùt lơgar ndrờm chờ hờp tŭ tus càr Dăk Lăk, hơ̆ là nhơl sền nhơl chờ sinh thái. Càr Dăk Lăk geh kơphe, geh bơta chài rơgơi cing mồng mờ bơta niam chài geh uă bơta, tàm hơ̆ uă ngan là bơta niam chài rơwas. Tŭ do, càr gam lơh jăt broă nhơl chờ đềt mềr mờ rơwas den mìng is măt sơnđan lơm kung neh lơh geh nùs nhơm kờñ tus bơh cau năc dê sơl. Bơdìh hơ̆ tai, tŭ do ală hìu neh rơcang lơh homestay, farmstay pơgồp bal mờ nhơl chờ tơlir mờ kơl jăp, tàm hơ̆ uă ngan là mờ broă lơh sa suơn sre den càr he kung geh uă bơta pràn bè lơh sa suơn sre, den do kung là dùl bơta pràn nàng tơnguh bơtàu nhơl chờ lơh sa suơn sre tàm tơngai tus”.

Tơnơ̆ mờ tơngai gơtìp aniai bơh kòp gơtờp, tàm bơta bè ờs pa, càr Dăk Lăk gam lơh ngan lơh jăt uă broă lơh nàng hòi jà broă lơh nhơl chờ. Bal mờ ală broă lơh bè gàr niam ờ do ờ dă tàm broă rơcang sơndră mờ kòp Kovid-19; broă lơh di pal mờ cau năc gơtìp F0, càr kung gam lơh ngan nàng bơ̆t bơtàu ală phan nhơl chờ geh uă bơta mờ lơh jơh bơta pràn càr dê.

Cau cih H’ Xíu-Cau mblàng Ndong Brawl