VOV4.K’ho- Tơnguh ală broă lơh Sơnam pa lơh broă dong kờl is nam 2022 nàng dong kờl làng bol kal ke geh tai bơta chờ hờp sơnam pa, wă rò sa tềp. Do là dùl tàm ală kơnòl broă geh ai tơlik tàm pơrjum tơn jơh broă lơh đoàn mờ srơh ơruh pơnu, kơnòm pa tàu, kơnòm dềt nam 2021, lam lơh kơnòl broă nam 2022 bơh Tỉnh đoàn Dăk Lăk dê geh lơh ngai 17/01. Jat jơnau đơs bơh Tỉnh đoàn Dăk Lăk dê, tàm nam lài, broă lơh dong kờl rơcang sơndră kòp Kovid-19 geh cau kơnòm să Dăk Lăk pơgồp bal lam lơh geh cồng nha. Bơh hơ̆ hòi jà tă pơgồp mờ phàt git nđờ rhiang rbô nơm chèu glòm muh mat, dà lơh kloh khuẩn, krơh sơndră dà mprañ mờ phan sền gàr să jan, kờp priă rlau 1 tơmàn đông.

Gùt càr neh dong kờl mờr 24 rbô kơldung phan sền gàr ờdo ờdă rài kis mờ kơldung sơnơm sền gàr ờdo ờdă ai làng bol mờ ơruh pơnu, kơnòm pa tàu, kơnòm dềt geh rài kis kal ke in, kờp priă mờr 6 tơmàn đông. Bal mờ hơ̆, ală kấp ƀộ đoàn tàm càr neh lam lơh geh mờr 2 rbô 700 broă lơh, bơnah broă ơruh pơnu; lơh pa rlau 119 kơi sồ gùng àng- tơlir-sàng goh- niam bơnĕ- gơguh jak mờ ờdo ờdă; lam lơh bơto pơlam, pơlam jòi broă lơh mờ yal tơnggit jòi broă lơh ai git nđờ jơt rbô dơ̆ đoàn viên ơruh pơnu, kơnòm pa tàu in; dong kờl git nđờ rhiăng broă lơh ơruh pơnu lơh sa, sơn đờm mut lơh broă, sơn đờm lơh broă.

Cau mblàng K’Duẩn