Bơh nggùl nhai 11 nam do, Mpồl đơng lam bè broă jòi, rồ tơrgùm mờ ai đal git muh măt ƀồc ntìng cau ling chơ̆t màng (gam sơnđan là Mpồl đơng lam 515) càr Dăk Lăk neh lơh pơrjum ai mpồl K51 in lòt gùng tus càr Mondulkiri (Campuchia) lơh kơnòl jòi, rồ tơrgùm, tơnrê ƀồc ntìng cau ling chơ̆t màng bal mờ cau jăk chài lơgar Việt Nam chơ̆t phi să tàm ală rài tam lơh tàm lơgar Campuchia tàm kàl prang 2022-2023.

Tàm lơgar Campuchia, Mpồl đơng lam 515 càr Dăk Lăk neh lơh ală broă tìp măt, lam sồr gơnoar atbồ bal mờ làng bol tàm lơgar do sền gròi, ai tơl bơta ƀuơn nàng dong kờl kwang bàng, cau ling tàm Mpồl K51 tàm tơngai lơh jăt kơnòl. Mờ geh ală broă dong kờl làng bol; yal tơngit tơl ală broă dong kờl di jăt broă dong kờl bơh lơgar Việt Nam dê gơwèt mờ ală cau lơi yal di ƀồc ntìng cau ling chơ̆t màng lơgar Việt Nam. Tàm broă lơh jăt kơnòl, ală kwang bàng, cau ling tàm Mpồl K51 kung lơh jăt mờ lơh di nền nòn adăt boh lam Dà lơgar Campuchia dê, git jơnau bal tàm bơta niam chài rơgơi, bơhiàn ờs mờng tàm ƀòn lơgar.