Tŭ do, tàm ală Trạm ƀiến áp 110 KV ờ geh cau drơng măy tàm càr Dăk Lăk, broă tam gơl ñấc tam pà bơta pràn bơh măy ƀiến áp dê kung gam pal lơh bơh broă lơh mờ tê sơl tàm Anih tờm pờ bơh càr dê. Den tàng bè hơ̆, khà măy ƀiến áp uă, broă pờ bơh ngài geh bơta lơyài, gơrềng tus broă pà đèng mờ bơta ngui jŏ bơh măy mok dê, lơh hoàc hươr bè đah phan bơna.

Broă tơrlòng pờ ală phan pờ điện áp lơh is jơh lơm mờ măy tàm trạm 110 KV Buôn Hồ mờ Krông Năng geh dong lơh niam ngan rlau jơh bè điện áp sền gàr niam ngan ai gùng che đèng mờ ồs đèng tam gơl in, tơrmù hoàc hươr bè đèng ngui, tơnguh uă cồng nha broă lơh ătbồ pờ, tơnguh uă bơta pin dờn pà đèng. Pơn jăt hơ̆, Kông ty Ồs đèng Dăk Lăk geh kơlôi tus ngui pờ is điện áp tàm jơh ală Trạm ƀiến áp, rơhời lơh geh jơnau kờñ gùng che đèng ngăc ngar tàm tơngai tus.