VOV4.K’ho- Mờ tơngume “Gơ hòi gơ jà bơcri priă bơtàu tơnguh kơ̆ kơljap jŏ jòng sùm lơh sa suơn sre phan bơna tac bro tơrgùm bal, gơ jat bal mờ lơh gơlik, tac phan lơh gơs”, Pơrjum hòi jà bơcri priă gah lơh sa suơn sre càr Dăk Lăk nam 2022 geh lơh tàm ngai 28/4/2022 tàm ƀòn dờng Buôn Ma Thuột, càr Dăk Lăk.

Pơrjum geh bơta tus bal bơh Ƀộ Nông nghiệp mờ Phát triển Nông thôn dê bal mờ ală Ƀộ, gah broă lơh, anih lơh broă dà lơgar; Đại sứ quán 15 lơgar, ală mpồl nac dunia; Kwang đơng lam bồ Ủy ƀan Ñân zân, Sở Nông nghiệp mờ Phát triển Nông thôn, Sở Kế hoạc mờ Đầu tư bơh 25 càr, ƀòn dờng dê; rlau 200 nă kwang bàng ala mat ală hiệp hội, gah lơh phan, mpồl lơh sa kă bro, cau bơcri priă tàm lơgar mờ lơgar ndai, ală anih kă bro tàm điện tử dờng tàm lơgar... Tàm pơrjum do, càr Dăk Lăk yal 109 rơndap broă lơh, bă tiah gơ hòi gơ jà bơcri priă, geh tam phan, ròng phan, lơh sa suơn sre gơ jat bal mờ nhơl chờ brê bơnơm, tàm tơrbŏ bal lơh sa jat ròt bơta kuơ lơh geh kơ̆ kơljap jŏ jòng sùm...

Pơrjum hòi jà bơcri priă gah lơh sa suơn sre càr Dăk Lăk nam 2022 là broă geh kuơ dờng màng ngan, là tŭ nàng càr Dăk Lăk yal tơnggit bơta geh ngan, bơta ƀuơn, bơta pràn, bơta niam ù tiah nàng bơtàu tơnguh tàm gah lơh sa suơn sre, lơh gơlik phan bơh suơn sre, brê bơnơm, phan tàm dà, lòt bal, lơh ngan lơh niam broă bơcri priă, kă bro, dong kờl cèng tus ală cau bơcri priă in rùp hin bè Dăk Lăk bềng bơta pràn bơtàu tơnguh mờ là tiah tus niam ngan, ờdo ờdă.

Cau mblàng K’Duẩn