Dơ̆ pơrlòng jơh bơsram kâp pe nam 2023 rơcăng lơh bơh ngai 27/06 tus ngai 29/06/2023. Nam do, càr Dăk Lăk geh rlau 21 rbô 100 nă cau pơrlòng cih mat dan lòt pơrlòng, tàm hơ̆ geh rlau 610 nă cau pơrlòng khăt gơboh is. Càr Dăk Lăk pơn jăt tai rơndăp 32 anih pơrlòng ngan ngồn bal mờ 886 cơldŭ pơrlòng tàm 15 kơnhoàl, thị xã mờ ƀòn dờng.

Tàm dơ̆ pơrjum yal broă lơh rơcăng bơyai lơh Dơ̆ pơrlòng nam 2023, ngai 22/05, Mpồl đơng lam pơrlòng jơh bơsram kâp pe càr Dăk Lăk sồr ală sở, ngàñ mờ ală tiah pal rơcăng lài niam ai dơ̆ pơrlòng jơh bơsram kâp pe in, kwơmàng lơh bè lơi ală cau pơrlòng tàm tiah sar lơgar ngài geh yal tơngĭt jơnau wil tơl jơnau yal tơngĭt jơnau bè dơ̆ pơrlòng. Đơs tàm dơ̆ pơrjum, mò H’Yim Kđoh, Phó Củ tịc Ủy ƀan Ñân zân càr Dăk Lăk, Kwang ătbồ Mpồl đơng lam pơrlòng kâp càr sồr, ală kâp, ală ngàñ, ală tiah pal sơlơ tơnguh tai broă lơh pơgồp bal, rơcăng lài geh gùng dà broă lơh pơrlòng loh làng, geh ngan, lơh bè lơi nàng dơ̆ pơrlòng geh lơh dùl bă lơngăp lơngai, geh cồng nha, lơh niam mờ di jơnau cih bơh adat boh lam dê.