VOV4.K’ho- Tềng đap broă gơlik geh kal ke bơh kòp Kovid-19 dê tàm càr Dăk Nông, Củ tịc Ủy ƀan Ñân zân càr Dăk Nông ồng Hồ Văn Mười sồr ală gah broă lơh, ală tiah pal lơh broă jơh nùs, tơnguh gơnoar broă bơh cau atbồ dê tàm broă lơh rơcang sơndră kòp mờ kung lam lơh kơnòl bơtàu tơnguh lơh sa mpồl bơtiàn. Kờp tus drim ngai 23/02, gùt càr Dăk Nông git gŏ 13 rbô 169 nă cau bơtờp kòp Kovid-19. Tàm hơ̆ uă ngan neh bời kòp mờ rê bơh hìu sơnơm. Tàm 2 poh rềp ndo, kòp bơtờp tàm càr Dăk Nông gam gơlik geh kal ke, khà cau bơtờp pa tàm mpồl bơtiàn sùm gơguh jơnhua.

Sơm kòp ai cau bơtờp kòp Kovid-19 in tàm Hìu sơnơm kơnhoàl Cư Jut, càr Dăk Nông

Tàm dơ̆ pơrjum pờ tơlik tàm internet mờ ală kơnhoàl, ƀòn dờng bè broă lơh rơcang sơndră kòp bơtờp, ồng Hồ Văn Mười, Củ tịc Ủy ƀan Ñân zân càr Dăk Nông đơs nền, broă lơh kuơmàng kung gam là sơnơm vaccien mờ lơh jat jơnau sồr 5K. Củ tịc Ủy ƀan Ñân zân càr Dăk Nông sồr, bal mờ broă lơh rơcang sơndră kòp Kovid-19, kwang đơng lam bồ ală sở, gah broă lơh, mpồl lơh broă, ală tiah pal lơh ngan lam lơh niam kơnòl broă bơtàu tơnguh lơh sa- mpồl bơtiàn tàm bơta bè ờs pa.

Cau mblàng K’Duẩn