VOV4.K’ho- Mìu càl rơbŭt dờng sồ 04 neh lơh ală gùng che ồs đèng tàm ù tiah càr Quảng Nam dê gơtìp ờ diơng kơn jơ̆ ngan, ờ geh đèng tàm uă tiah. Tơnơ̆ tŭ dờp geh jơnau sồr bơh Tổng Kông ty Ồs đèng tiah tàm gùl lơgar, Kông ty Ồs đèng Dăk Nông neh lơh 2 mpồl lam lài tus dong kờl càr Quảng Nam lơh niam wơl gùng che ồs đèng.

PC Dăk Nông lơh niam wơl gùng che ồs đèng tàm Núi Thành, Quảng Nam

Jat hơ̆, gĭt nđờ jơ̆t nă kwang bàng, kông ñân bal mờ tơl làm rơndeh rơndồ, phan ngui lơh broă, phan bơna, măy mŏk lơngap lơngai, broă lơh dong kờl.... neh tus kơnhoàl Núi Thành, càr Quảng Nam bơsong jơnau gơ lời wơl tơnơ̆ mìu càl rơbŭt dờng. Tàm tiah do, gơ lơh bè jơh ală gùng che ồs đèng hạ thế gơtìp càl pồt gơ pừ, uă jrong đèng pă pừ, gùng che đèng tăc, ngơr bam tàm dà... Ală kông ñân neh mhar lòt sền ù tiah, geh gùng dà broă lơh bơsong, tàm pà gơ gơs ală mpồl lơh ală broă lơh gàr niam bơta lơngap lơngai, mhar ngan rlau jơh. Kông ñân PC Dăk Nông ờ rơngòt lơh broă tàm trồ mìu, trồ tơngai duh lơh broă sùm gan tŭ tơngai nàng pơgồp bơnah gờñ lơh niam wơl, pờ gùng đèng wơl ai làng bol càr Quảng Nam in.

VOV Tây Nguyên-Cau mblàng K’Hạnh