VOV4.K’ho- Bơh tơnơ̆ dơ̆ sa tềp bơhiàn tus tŭ do, tàm càr Dăk Nông neh gŏ mờr dùl rbô nă cau pơgru mờ kơnòm bơsram bơtờp kòp Kovid-19. Bulah bè hơ̆, tŭ do gah bơto bơtê càr do kung gam gàr niam ală bơta pal geh nàng kơnòm bơsram kâp bàr mờ kâp pe in pơn jăt tai lòt bơsram tàm hìu bơsram.

Kơnòm bơsram bơh ơdŭ 6 tus hơđang geh lòt bơsram wơl tàm hìu bơsram tàm càr Dăk Nông

Jăt tơrgùm kờp bơh Sở Giáo zụk mờ Đào tạo càr Dăk Nông dê, bơh tŭ kơnòm bơsram lòt bơsram wơl tàm hìu bơsram tơnơ̆ dơ̆ ơm rlô sa tềp tus tŭ do, jơh gùt càr neh gŏ 132 nă cau pơgru mờ rlau 800 nă kơnòm bơsram bơtờp kòp Kovid-19. Tài bơh khà cau bơtờp kòp Kovid-19 gơbàn uă tàm kâp dùl mờ mầm non, den tàng Dăk Nông neh ai kơnòm bơsram mầm non mờ kâp dùl tàm jơh gùt càr in ơm ing tus hờ hìu bơsram tus dì tŭ geh jơnau yal pa; tam gơl wơl tus ală broă lơh bơsram online, bơsram tàm anih sơñio rùp mờ cau pơgru phàt sră lơh jơnau bơsram. Ală kâp bơsram kâp bàr mờ kâp pe kung gam bơyai lơh bơto bơsram tơn tàm hìu bơsram mờ mìng ală ơdŭ lơi geh pơhìn uă den geh lơh jăt bơto bơsram bơh tàm internet.

Ồng Nguyễn Văn Toàn, Kwang ătbồ Sở Giáo zụk mờ Đào tạo càr Dăk Nông pà gĭt, Sở sồr ală hìu bơsram lơh jăt niam jơnau sồr rơcăng sơndră kòp, bañ sền ờ sơ̆p, ờ rơcăng ngăc mơya kung bañ rơngòt rơngơ̆t ir. Tŭ do, càr kung gam gàr niam ală bơta pal geh ai kơnòm bơsram bơh ơdŭ 6 tus hơđang in lòt bơsram wơl tàm hìu bơsram.

Cau mblàng Lơ Mu K’Yến