Tơnau dà Tào Dùng- tơnau dà hìu măi pờ tơlik ồs đèng Đồng Nai 3 tàm kơnhoàl Dăk Glong, càr Dăk Nông, là tiah ơm kis bơh git nđờ rhiang hìu bơnhă làng bol ơm kis mờ broă ròng ka tàm hìu gŭ, tras ka tàm tơnau dà mờ jun nac lòt sền, nhơl chờ mờ plung. Tàm tơnau dà tŭ do geh 6 anih ròng ka, tơl anih tơrgùm bơh 4 tus 5 hìu bơnhă. Geh mpồl lơh broă geh gơnoar tơngkah, pơlam lơh jat nền nòn ală broă lơh gàr ring niam nàng rơcang sơndră rềs àr bŭ dà, sền gàr tiah kis tàm dà mờ sền gàr brê, ồng Bùi Văn Điệp, cau ròng ka tàm hìu gŭ tàm tơnau Tào Dùng neh 3 nam do, yal: “Ròng ka den lài ngan he pal gàr niam tiah ơm kis, khat dùl broă lơi kung pal gàr kloh niam. Ai bè ring niam lòt rê den he kung pal gàr niam, pơn yơu bè soh àu pơr đồng, dilah geh bơta ờ niam, rềs àr lơi den kung lơngai he in. Ai bè brê den tàm do cau kung mblàng yal sùm, he kung bañ kơl chi, tài do là brê dà lơgar, tiah sền gàr brê”.

Bal mờ 6 anih ròng ka tàm hìu gŭ, tơnau Tào Dùng gam geh 3 anih plung ơm cih mat lơh broă jun, rò nac nhơl chờ. Mpồl ring niam lòt rê tàm gùng càr Dăk Nông neh lòt sền cih mat, sền sơ wì ơhò, ală phan bơna gàr ring niam bè àu pơr đồng, pơr đồng dong kờl, dong klàs băm dà, phan bơna rơcang sơndră crùh ồs sa. Ồng Trần Quốc Long, kwang atbồ dùl kông ty nhơl chờ tàm do, pà git: “Ală cau măi ơhò, plung bol hi dê neh geh bơto bơtê, geh sră cơng tàng măi ơhò pơndiang nac nhơl chờ. Ală cau lơh broă kung neh geh bơto pơlam mờng chài lơh nhơl chờ bơh Sở Văn hóa, Thể thao mờ Zu lịc càr Dăk Nông lơh. Bol hi kung kơp kờñ Ủy ƀan Ñân zân càr mờ ală sở, gah broă lơh lơh gơlik bơta niam nàng ală mpồl lơh sa kă bro tàm Tào Dùng in pờ ơdŭ bơsram, lơh sră cơng tàng cau tàm mpồl măi ơhò nàng tơl nă cau gơtùi git mờ tơnguh mờng chài lơh broă he dê nàng drơng nac nhơl chờ in”.

Jat tơrgùm kờp bơh anih lơh broă geh gơnoar dê, tàm tơnau Tào Dùng, hìu măi pờ tơlik ồs đèng Đồng nai 3 mờ 4 tàm kơnhoàl Dăk Glong geh 34 nơm plung nhơl chờ, rơkì mờ rơkì măi gam lơh broă. Bơh sền sơ wì, mpồl lơh broă geh gơnoar git gŏ 1 mpồl lơh sa kă bro geh 4 nơm plung nhơl chờ ndrờm jơh tơngai sền sơ wì. Bơdìh hơ̆ tai, gam geh uă ơhò, plung ờ hềt cih mat. Jat ồng Lê Đình Hải, Phó Kwang atbồ cơldŭ atbồ rơndeh rơndồ mờ cau măi- Sở Giao thông vận tải Dăk Nông đơs, do là bơta kal ke ngan gơ wèt mờ càr tŭ uă ngan ơhò plung là phan lơh is, ờ tơl bơta pal geh nàng sền sơ wì: “Sở Giao thông vận tải kung sùm pơgồp bal mờ ală anih lơh broă, mpồl, gah broă lơh geh gơ rềng sơlơ tơnguh broă mblàng yal, sồr, hòi jà làng bol lơh niam ơhò plung ờ kơ̆ nàng lòt sền sơ wì, cih mat lơh broă jat jơnau sồr. Bal mờ hơ̆ anih sền sơ wì là Ci kụk sền sơ wì sồ 5 tàm Nha Trang kung pơgồp bal niam ngan mờ càr sùm pơlam làng bol mơya ală ơhò, plung do là lơh is jat mờng chài bơh yau, ờ geh sră nggal den tàng ờ geh tơl bơta nàng sền sơ wì”.

Bơdìh mờ broă pơlam làng bol lơh jat broă cih mat, sền sơ wì ơhò, plung jat jơnau sồr, pà àu pơr đồng ai ală hìu bơnhă ròng ka tàm hìu gŭ mờ ơm kis kềng gah tơnau dà, ală gah lơh broă geh gơnoar tàm càr Dăk Nông kung sùm sền sơ wì, mblàng yal, tơngkah nàng gàr niam ai ală broă lơh tàm tơnau Tào Dùng in. Jat hơ̆, sồr cau tờm ơhò, plung nhơl chờ bañ pơndiang kơn jơ̆ ir, bañ pơndiang gal ir khà cau geh ai, ơm ơhò plung jat di anih geh sồr; sồr nac soh àu pơr đồng tŭ đì ơhò plung lòt rê tàm tơnau dà…

Geh sền là Vịñ Hạ Long hơ đang bơnơm bơh Tây Nguyên dê, mơya broă lơh nhơl chờ tàm tơnau Tào Dùng kung gam lơh is lơm. Bulah tus tŭ do ờ hềt gơlik geh rềs àr lơi pơlia soh, nhơl chờ Tào Dùng kờñ ngan bơyai lơh atbồ nền nòn mờ ring niam nàng gàr niam rlau tai ai nac nhơl chờ in.

Lài mờ sa tềp bơhiàn yau Qúy Mão, Thủ tướng Cíñ phủ neh geh sră nggal pơyua bè gàr niam lòt rê tàm tơngai sa tềp. Tàm hơ̆, Thủ tướng Cíñ phủ sồr ală tiah sơlơ lòt sền, sền sơ wì, lơh glài kràñ ală broă lơh lơh tìs ring niam lòt rê tàm gùng ù gờl, gùng rơndeh ồs, gùng tàm dà. Lơh glài kràñ ală cau ờ soh àu pơr đồng tŭ đì rơkì, ơhò, plung; sền sơ wì ơhò plung ờ rơcang tơl phan dong klàs, cau măi ờ geh sră măi, sră cơng tàng mờng chài dipal… Sền sơ wì broă lơh jat jơnau cih adat boh lam dê bè sền gàr lơngăp lơngai, ring niam lòt rê tàm anih ơhò, plung ơm drơng nac nhơl chờ, ală gơl gùng tàm dà, ngan là ală gùng pơndiang nac bơh ù gờl lòt hờ bồt, ală gơl gùng dà dờng mờ tiah dà geh bơyai lơh chờ.