VOV4.K’ho- Nàng pleh ală bơta aniai bè ồs đèng, ngan là tàm kàl mìu càl rbut, ală mpồl ồs đèng Dăk Nông pơgồp bal mờ gơnoar atbồ tàm ƀòn lơgar, ală anih lơh broă, mpồl cau tàm kâp hơ đơm bơyai lơh uă dơ̆ mblàng yal ngui đèng ờdo ờdă. Tàm ală dơ̆ mblàng yal, làng bol geh mblàng lơh loh, đal git ală tềl tơnggŏ ờ niam bè đèng, pơlam bơta chài ngui phan đèng tàm hìu bơnhă, ală broă lơh rơcang lài sơndră, tơrmù ƀà jơnau pơhìn ồs sa bơr toh, rềs àr tài bơh đèng lơh gơbàn.

Gah ồs đèng kung pơgồp bal mờ gơnoar atbồ tàm ƀòn lơgar hòi jà làng bol koh, klah ntê chi pơhìn pă, gơ pừ tàm gùng che đèng, ờ tam chi rềp tiah geh gùng che đèng kao áp lòt gan. Bal mờ hơ̆, gah đèng kung neh phàt rlau 1 rbô pang sră cih jơnau tơnggit mblàng yal bè ờdo ờdă đèng tàm làng bol. Bal mờ sơlơ tơnguh broă lơh mblàng yal, ồs đèng Dăk Nông gam gròi sền bơcri priă, lơh niam gùng che đèng, kuơmàng là gùng che đèng hạ áp tàm ƀòn lơgar.

Cau mblàng K’Duẩn