Do là ală khà kờp pa geh Ủy ƀan Ñân zân càr Dăk Nông yal tus Mpồl đơng lam dà lơgar bè rcang sơndră trồ tiah lơh aniai. Bơh ngai 28 nhai 7 tus ngai 18 nhai 8 pa do, tàm ù tiah càr Dăk Nông geh mìu dờng jŏ jòng tàm uă tiah gơlam tus lơh gơbàn ngơr bam dà uă tiah tàm uă tiah làng bol ơm kis mờ gơ hùc ù, gơ hoài ù tàm bàr pe tiah. Mìu dờng dà kŏ dà cò neh lơh 2 nă cau chơ̆t tài bơh gơtìp dà tih pơr dô, lơh ngơr bam dà 275 nơm hìu, rlau 700 lồ phan tam mờ pơgap 230 lồ tiah ròng tam phan tàm dà. Bal mờ hơ̆, dùl ròt broă lơh bơt bơtàu gùng lòt mờ bơtơ̆t rbòng dà gơtìp hoàc huơr tài bơh gơ hùc ù, gơ hoài ù. Kờp jơh hoàc huơr geh kờp dŭ lài gơguh tus 1 rơbô 046 tơmàn đong.

Tàm dơ̆ mìu dờng dà tih do, Ủy ƀan Ñân zân càr Dăk Nông neh 2 dơ̆ yal jơnau jal mhar bè trồ tiah lơh aniai. Broă bơsong jơnau gơ lời wơl tài mìu dờng dà kŏ dà cò, trồ tiah lơh aniai bơh càr Dăk Nông dê gam gơtìp uă bơta kal ke. Tŭ do, kes priă rcang sơndră trồ tiah lơh aniai bơh càr dê mìng gam 2 tơmàn 900 tơlak đong. Tàm tŭ kes priă rcang lài bơh càr dê nam 2023 mìng rlau 74 tơmàn đong. Den tàng, Ủy ƀan Ñân zân càr Dăk Nông sồr Mpồl đơng lam dà lơgar bè rcang sơndră trồ tiah lơh aniai tơrgùm wơl, dan mờ Thủ tướng Cíñ phủ dong kờl priă jền bơh kes priă dà lơgar dê ai càr in mờ khà priă 661 tơmàn đong.