Tàm nđờ ngai do, ală anih lơh broă geh gơnoar  bơh càr dê gam jal mhar lơh niam wơl bơta nchùn kơn jơ̆ ngan taluy gùng Hồ Chí Minh tàm Kơi sồ 1936+080 mờ Kơi sồ 1936+300 gơ wèt ù tiah thôn 3, xã Quảng Tín, kơnhoàl Dăk Rlâp. Bàr anih do gơlik geh bơta nchùn, rơ dàng taluy gah thòng mờ bă tiah cò tơnring, bồr ù, pơhìn lơh gơ rềng tus gùng ù gờl mờ lơh roh bơta lơngăp lơngai lòt rê tàm gùng. Tàm bàr anih do, mpồl atbồ gơl gùng Hồ Chí Minh gam bềr wơl ală tềl rơ dàng kềng bơdìh rơbòng yuh dà jat kềng gah nàng tơrmù ƀà bơta gơ rềng tus broă lơh. Mờ kung pơgồp bal mờ gơnoar atbồ tàm ƀòn lơgar pal lơh tờ ù nàng bồr, lơh niam wơl ù tiah kờñ tơrmù ƀà bơta kơn jơ̆ tus taluy bơnàng gùng, tồt ƀàng tơngkah lài, dang che ờ ai lòt tàm tiah gơtìp nchùn, rơ dàng.