Ồng Đoàn Minh Thuận, Phó Củ tịc Ủy ƀan Ñân zân xã Quảng Trực, kơnhoàl Tuy Đức, càr Dăk Nông pà git, tàm nggùl mang ngai 31/7, tàm ù tiah ƀòn Bu Krắc, xã Quảng Trực gơlik geh 2, 3 sap bơrtoh dờng nisơna. Tus àng drim ngai 01/8, làng bol sền gŏ geh uă tềl tơdàng tàm mat ù.

Tơnơ̆ tŭ klo yal, gơnoar atbồ xã Quảng Trực mờ mpồl lơh broă geh gơnoar kơnhoàl Tuy Đức neh lòt tus tiah gơlik geh bơta do nàng sền. Tàm do, sền gŏ uă tềl tơdàng jòng mờr 200 thơk, ơnàng bơh 10 tus 15 thơk tàm ƀòn làng bol ơm kis tơn. Tơnơ̆ hơ̆, gơnoar atbồ mờ mpồl lơh broă geh gơnoar neh hòi jà, ntrờn làng bol bal mờ phan bơna lik bơh tiah tơdàng tus tiah lơngăp lơngai. Tŭ do, gơnoar atbồ xã Quảng Trực mờ kơnhoàl Tuy Đức gam ai cau lơh broă mờ geh ală broă rơcang lài nàng sơndră mờ ală broă nisơna gơlik geh.