VOV4.K’ho- Jat Sở Lao động, Thương ƀiñ mờ Xã hội càr Dăk Nông yal, di sa tềp bơhiàn Ñam Zần 2022, gùt càr Dăk Nông neh lam lơh ală mpồl lòt còp, pà rlau 73 rbô bơnah phan ai ală mpồl, cau dùl nă să geh pơn rơ jak, hìu bơnhă geh sră dong kờl bơh dà lơgar, cau geh màng mờ kac màng in. Kờp jơh priă tă lơh rlau 33 tơmàn đông, geh tă bơh kes priă dà lơgar, tàm hơ̆ tơl bơnah phan geh bơh 300 rbô tus 1 tơlak đông gơ jat tàm tơl nă cau. Mùl màl, ală cau geh dờp phan pà sa tềp bơhiàn geh: Cau geh màng mờ kac màng, cau tờm cau ling chơt màng; hìu bơnhă rƀah là làng bol jơi bơtiàn kòn cau dùl êt nă cau; cau geh sền gàr mờ dong kờl bơh mpồl bơtiàn; kwang bàng jơh sơnam rê rlô lơh broă; hìu bơnhă geh kòn gam lơh kơnòl tàm Trường Sa, hìu dra DK1; ƀòn làng bol jơi bơtiàn kòn cau dùl êt nă cau.

Ồng Y Long, Phó Kwang atbồ Sở Lao động, Thương ƀiñ mờ Xã hội càr Dăk Nông pà git: “Đảng, dà lơgar sùm gròi sền, kơlôi rơcang ai làng bol in geh hờm răm. Pơn yơu tàm dơ̆ sa tềp do, càr Dăk Nông pà tơl ƀòn in 10 tơlak đông nàng làng bol in sa tềp. Lài do geh bơta lời huĭ cau geh dong kờl, mơya nam do neh jàu kấp xã in kờp sền tơl hìu bơnhă. Tơnơ̆ hơ̆ bơh mặt trận, hội Cữ thập đỏ kơnhoàl nàng kờp sền ală hìu bơnhă rƀah neh di halà ờ hềt. Dilah gam lời huĭ den jàu ai ală thôn, ƀòn in kờp sền wơl, ờ lời huĭ dùl hìu bơnhă lơi.”

Cau mblàng K’Duẩn