Bồ kàl mìu nam do, tàm càr Dăk Nông neh geh ală dơ̆ mìu jŏ jòng lơh gơbàn jơnau pơhìn dà kŏ dà cò, tơrlah ù tàm ală tiah thòng lơyah. Rơcang lài pleh mờ trồ tiah lơh aniai, Ủy ƀan Ñân zân càr Dăk Nông neh sồr ală sở, gah broă lơh, mpồl lơh broă, ală tiah kờp sền, bơ tơl ală broă rơndap lơh bơsong broă gơlik geh mùl màl, kuơmàng là tàm ală bă tiah pơhìn gơlik geh ngơr bam, tơrlah, nchùn ù… Ală tiah tơrmù ƀà pơrjum mờ broă lam lơh pơrjum pờ tơlik tơn tàm internet tus kâp xã, sơlơ tơnguh tai mblàng yal, tơnguh jơnau git wă rơcang lài pleh mờ trồ tiah lơh aniai tus làng bol, sồr ờ gŏ di sền ờ sơp tềng đap bơta mìu nhàc dà kŏ dà cò. Cau tờm ală tơnau dơng dà, anih lơh sa suơn sre mờ ală tiah pal kờp sền, sền sơ wì nền nòn nàng lơh niam wơl mờ rơcang lài ală broă lơh jat jơnau đơs 4 tơn tàm dùl anih, ờ lời gơlik geh rơmơp ndơl nisơna.