Hơ̆ là dùl tàm ală jơnau sồr mờ Ủy ƀan Ñân zân càr Dăk Nông dê sồr lơh nàng lơh mhar tŭ tơngai ai priă jền bơcri priă dà lơgar. Nam 2023, kờp jơh priă bơcri dà lơgar dê tàm càr Dăk Nông là 3 rbô 473 tơmàn đong. Tus lồi nhai 02, jơh gùt càr neh ai priă pơgăp 185 tơmàn đong, geh rlau 5% broă rơndăp lơh. Mìng is gơwèt mờ ală broă lơh jơnau kờñ dà lơgar dê nam 2023 geh kờp jơh mờr 1 rbô 120 tơmàn đong kung gam ờ hềt geh ai priă jền sơl. Khà priă jàu tai bơh ală broă lơh jơnau kờñ dà lơgar nam 2022 là 758 tơmàn đong, càr rơ̆p pa ai geh 17% lơm.

Tàm pơrjum mhar ai càn priă bơcri dà lơgar dê pa do, ồng Hồ Văn Mười, Củ tịc Ủy ƀan Ñân zân càr Dăk Nông sồr ală kơnhoàl, ƀòn dờng, ală sở, ngàñ pal rơcăng lài, ngac ngar, bơceh pa tàm tŭ lơh, sùm tàm lùp, pơgồp bal niam nàng ai priă di jơnau kờñ, di tơngai. Tus ngai 30/06/2023, ală rơndăp broă lơh ờ hềt sơnđờm lơh, ờ hềt ai priă jền sồr koh jàu priă ai ală rơndăp broă lơh geh lơh niam in, lơh ngan tus lồi nam 2023 do ai priă geh rlau 95%.